LIME аппын үүсгэн байгуулагч @itulga - Футболка, нисгэгчийн гарын авлага, утас...

Дэлхийн Монголчуудыг холбоно

01. Футболка

Бид футболкыг харин ч нэг төрөл, төрлөөр нь өмсдөг. Ойн баяр, шинэ жил, марафон гэх мэт онцлох үйл ажиллагаа бүрээр цөөн загварын футболка, цамц, бомбер хийлгэдэг уламжлалтай. Олон жил ажилласан залууст маань бараг л шүүгээ дүүрэн байгууллагын логотой хувцас бий.

02. Нисгэгчийн гарын авлага

Онгоц жолоодох багын мөрөөдлөө биелүүлэхээр PPL буюу “Private Pilot License” авахаар суралцаж байгаа. Зургаан төрлийн онолын шалгалт, 40 цагийн нислэг үйлдэж байж үнэмлэхээ авдаг болохоор энэ номтой дотно найзалж байна.

03. Гар утас

Өдөр тутмын ажлаа ихэвчлэн гар утсаараа амжуулдаг. "CallPro", "LIME"-ын дийлэнх үйлчилгээ үүлэн технологид суурилсан, олон төрлийн интеграц агуулж байдаг учраас гар утсаараа ажиллахад их хялбар. Харин утсаа сонгохдоо мэдээллийн нууцлал, хүчин чадал, хурд зэрэгт анхаардаг. Ер нь би "Apple" компанийн үнэнч хэрэглэгч.

04. Утасгүй хулгана

Олон цагаар компьютер дээр ажиллахдаа Logitech MX Master-ыг хэрэглэдэг. Гурав хүртэлх төхөөрөмжид зэрэг холбогддог болохоор цаг их хэмнэдэг шүү. Дээрээс нь гарт эвтэйхэн, чанартай.

05. Macbook Pro

Саяхан Pro 2021-тэй болсон. M1 Pro-г сонгосон шалтгаан нь ердөө л CPU. Ингэснээр цэнэгээ барих чадвар нь дээшилсэн. Би ширээний ард удаан суудаггүй болохоор лаптоп сонгохдоо баттери барилт, хүчин чадалд нь их анхаардаг.

06. Oculus VR

Ирээдүйд хүн бүр Метаверс-д асар олон цагийг өнгөрөөдөг болно. Энэхүү шинэ орчныг илүү эрт таниж мэдэх, судлах зорилгоор энэ бүтээгдэхүүнд сүүлийн үед их дуртай болоод байна.

07. Spark

Цахим шуудан, календарыг нэгтгэсэн, гар утас болон компьютерын аль алинд нь ашиглаж болдог апп. Манай залуус бүх ажлаа GSuite календар ашиглан төлөвлөдөг. Имэйл, календар нэг дор байх нь ажлыг ихээхэн хөнгөвчилдөг шүү.

08. Termius

Олон сервер рүү холбогдох шаардлага байнга гардаг учраас Termius аппыг ашигладаг. Гар утас, таблет, компьютерт суулгаж ашиглах боломжтой. Байнга ашигладаг үйлдлүүдээ хялбаршуулах зэрэг олон сонголт бий.

09. Netflix

Амрах болон гадаад хэлээ сайжруулах зорилгоор кино үзэх дуртай. Disney+, HBO Max, Netflix зэрэг стрийминг үйлчилгээг ашигладаг.

10. LIME

Монгол дугаартай, ярианы апп. Аппаа нэвтрүүлснээс хойш нэг сар хагасын хугацаанд хоёр ч удаа хил дамнасан томилолтод явлаа. Гадаадаас Монгол руу дуудлага хийхэд маш хялбар, төлбөрийн систем нь ч олон төрөл. Өөрсдөө хөгжүүлж гаргасан апп хэдий ч ажлаар гадагшаа явахдаа хэргийг нь сайн гаргаж чадсан. Гадаадад байгаа найзууддаа ч санал болгосон. Их ам сайтай байгаа.