1964 он. Ливерпүүлийн дөрвөл Битлз хамтлаг Америкийн телевизээр анх удаа шууд тоглолтоо хийж, бүтэн тивийг дагуулах их аянаа эхлүүллээ. Энэ явдлаас 55 жилийн дараа, яг тэр тайзнаа ижил үсний засалт, адил хувцаслалттай 7 залуу шинэ дуугаа толилуулжээ. Таван арваны өмнөхийг санагдуулам хар цагаан шууд дамжуулалтыг сайн ажвал бөмбөрийн урд тэр хамтлагийн нэр зурайх ажээ. Гэхдээ тэр нэр Битзл биш BTS байлаа.

BTS бол яг одоо дэлхий дээрх хамгийн алдартай хамтлаг. Тэд бол өөрийн эх орон Өмнөд Солонгосыг төдийгүй Азийг, Азиар зогсолгүй дэлхийн хөгжмийн ертөнцийг доргиож ул мөрөө тодоос тодоор үлдээж буй үзэгдэл. Хэдхэн жилийн өмнө холоос хол мөрөөдөл л байсан амжилтууддаа дэс дараалан хүрсээр буй энэ хамтлагийн амжилтын нууц юу байв? Түүх хаанаас хэрхэн эхлэв? Хамтдаа сонирхоцгооё.


ЭХЛЭЛ - 1992.04.11

Seo Taiji and Boys MBC телевизийн тайзнаа дууллаа.

1992.04.11

Олон жилийн турш “даруу” байдлаа хадгалсаар ирсэн Солонгосын хөгжмийн ертөнцөд 90-ээд оныг хүртэл зохиолын хийгээд үндэсний дуу хөгжим ноёлсоор байв. 8 настайгаас 80 настай хөгшчүүл бүгд телевизээр цацагддаг хөгжмийн нэвтрүүлгүүдээс л шинэ дуу, шинэ уран бүтээлчдийн тухай олж мэддэг байжээ.

Гэвч энэ бүх амгалан байдал 1992 оны 4-р сарын нэгэн өдөр тэр чигтээ өөрчлөгдсөн юм. Өөрсдийгөө “Seo Taiji and Boys” хэмээн нэрийдэж, сул өмд, этгээд цамцаар гоёсон 3 залуу өнөөх хөгжмийн нэвтрүүлгийн тайзыг дуулиантайхан гарч ирсэн нь энэ. Хэдий тэд нэвтрүүлгийн шүүгчдээс хамгийн тааруу оноог аван тайзнаас сэтгэл гонсгор буусан ч “I Know / Nan Arayo” нэртэй дуу нь маргаашнаас нь эхлээд л чарт жагсаалтуудыг тэргүүлж эхэлсэн нь хэний ч санаанд ороогүй явдал байлаа.

Seo Taiji and Boys хамтлагийн гишүүд баруун талаас: Lee Juno, Seo Taiji, Yang Hyun Suk

Тэдний амжилт санамсаргүй байсангүй. Бүхэл бүтэн 17 хоногийн турш ноёрхлоо хадгалсан энэ дууны амжилтыг одоог хүртэл ямар ч хамтлаг, дуучид эвдэж чадаагүй л байна. Тэднийг 4 жилийн дараа тарахад Солонгосын урлагийн ертөнцөд аль хэдийн шинэ салхи дэгдчихсэн байв. Артистуудыг бэлтгэн төрүүлдэг энтертайнмент агентлагууд телевизүүдээс ч хүчирхэгжин, барууны шинэ урсгалуудын нөлөө хүчтэй мэдрэгдэх болсон байлаа. Хожмоо Big Bang, Girl’s Generation, Wonder Girls зэрэг алдартай хамтлагуудыг гаргаж ирсэн томоохон агентлагууд болох YG, JYP, SM бүгд энэ үеэс үйл ажиллагаагаа эхлүүлээд байжээ.


ӨРНӨЛ - 1996.09.07

К-поп хамтлагуудын анхдагч H.O.T гарч ирэв.

Mnet

1996 он SM Entertainment-ийн хувьд төдийгүй, Кпоп-ийн хувьд олз омог дүүрэн жил байв. Тухайн жил SM-ийнхэн анхны эрэгтэй айдол хамтлаг болох H.O.T-ийг нийтэд танилцуулжээ. “Хөгжмөөр нэгдсэн онцгой залуусын дуу, бүжиг, рэпийн хоршил” хэмээн тодорхойлогдсон тэд тэр даруйдаа Солонгосоор зогсолгүй Азийн зах зээлийг шуугиулсан билээ.

Харамсалтай нь, H.O.T хамтлаг агентлагтайгаа хийсэн гэрээн дээр харилцан ойлголцолд хүрч чадаагүйн улмаас 2001 онд тарсан юм. Хэдий богинохон хийгээд адармаатай замыг тэд туулсан ч гэсэн Солонгосын хөгжмийн ертөнцөд аль хэдийн мөрөө үлдээж дараа дараагийн “idol” буюу к-поп хамтлагуудын амжилтын жимийг тодорхойлж чадсан билээ.

Ирэх олон жилүүдэд тэдний бий болгосон амжилтаас улбаалан Солонгосын зах зээлийн хамгийн том экспортын салбар бүрэлдэн бий болж хүрээгээ тэлэн цоо шинэ брэндийг бий болгосон нь энэ байлаа.

Тэднийг тарахад олон мянган фэнүүд нь эсэргүүцэл зарлан Сөүлийн машин замыг хүртэл хаан жагсаал хийж байсан түүх бий.

ТЭСРЭЛТ 2008 - 2009 

Азийг доргиосон Wonder Girls, Big Bang, SNSD зэрэг хамтлагууд гарч ирэв.

SBS

2008-2009 оныг К-попын “Алтан үе” хэмээн үзэх нь бий. Энэ үед тэдний нэр алдрыг дэлхий дахинд бататгасан Girls’ Generation “Gee,” Big Bang “Haru, Haru,” Wonder Girls “Nobody” гэх мэт “классик” уран бүтээлүүд төрөн гарсан юм. Тэдний амжилтаас К-попын үндсэн 3 шинж чанарыг тодорхойлж болно.

1. Сайтар бэлдэж, боловсруулсан тайзны үзүүлбэр, бүжиг
2. Өөрсдийн өнгө төрх бүхий дизайн, брэнд шийдэл
3. Артистуудыг үйлдвэрлэх мэт зогсолтгүй ажиллах систем

2008 - 2010 оны К-попын хит уран бүтээлүүдийг сонсох

Youtube

К-попын дэлхийн хөгжмийн ертөнцөд өөрсдийн орон зайг амжилттай тэлж чадсан нэг том шалтгаан бол дуучдыг бараа бүтээгдэхүүн мэт үйлдвэрлэдэг систем юм. Тайзан дээр дуулж буй тэр залуучууд 10-12 настайгаасаа л асар их өрсөлдөөн дундаас шигшигдэн гарч ирдэг. Олон жилийн турш тусгай дуу, бүжгийн хичээлд хамрагдахын сацуу олон нийтийн өмнө биеэ хэрхэн авч явах, оддын амьдралаар амьдрахтай холбоотой төрөл бүрийн сургалт, хичээлээр нүдүүлдэг. Энэ олон шалгуурын эцэст азтай бөгөөд чадварлаг хэд нь тунаж үлдэн тайзан дээр гарах эрхийн эзэд болдог аж. Уран бүтээлчдийн олон сар, өдрийн нөр их хөдөлмөр бүхий мэргэжлийн агентлагуудын босгосон уг систем бол хаана ч зүйрлэшгүй өвөрмөц бүтэц юм.

ДЭЛБЭРЭЛТ - 2012.07.15 

Youtube-ийн хамгийн олон үзэлттэй бичлэг болох PSY-ийн Gangnam Style цацагдлаа.

Music Times

Барууны ертөнцөд нэвтрэх гэж удаа дараа бүтэлгүйтсэн К-попын хувьд 2012 он бол эргэлтийн цэг байлаа. Та бидний сайн мэдэх PSY-ийн “Gangnam Style” дуу дэлхийн даяар бүхий л хөгжмийн чартуудыг тэргүүлэн, борлуулалтаараа Billboard-ийн платинум цолыг хүртэл авч чадсан билээ. Дахилтан дээр гарах ганц өгүүлбэрээс өөр англи үггүй энэ дуу од болсон нь хачирхалтай санагдах мэт хэдий ч санамсаргүй хэрэг огт биш байсан юм. Учир нь энэ л мөчийн төлөө К-попын ард оршин тогтнох бүтэн систем боловсруулагдсан байлаа.

Яг энэ үетэй давхцан Rolling Stone сэтгүүлээс Хойд Америкийн зах зээлд амжилт олох магадлалтай топ 10 хамтлагийн жагсаалтыг гаргасан бөгөөд үүнийг Big Bang, Girls’ Generation, 2NE1 зэрэг хамтлагууд тэргүүлж байв. Хачирхалтай нь, энэ жагсаалтын хаана ч Сөүлийн хаа нэгтээ бэлтгэлээ базааж байсан өсвөр насны залуусыг дурдаагүй байсан юм. Энэ бол Bangtan Boys буюу BTS хамтлаг ба тэд ирэх жилүүдэд Солонгосын эрэгтэй хамтлагуудын имижийг эрс тэс өөрчилж олон улсын зах зээлд амжилт олох гэсэн ойлголтыг орвонгоор нь эргүүлэх учиртай аж.

БАЙЛДАН ДАГУУЛАЛ - 2017.05.21 

BTS Billboard Music Awards-аас шагнал хүртэв.

Billboard

2017 онд Billboard Music Awards-ийн топ сошиал артист хэмээх шагналыг BTS хамтлаг хүртсэн нь хэний ч төсөөлөөгүй үйл явдал байв. Арга хэмжээнд уригдсан явдал нь л нэр төрийн хэрэг байсан тэдний хувьд Justin Bieber, Selena Gomez, Ariana Grande хэмээх томоохон оддыг ардаа орхин ялагчийн индэр дээр гарна гэдэг мөрөөдөл мэт л санагдаж байлаа. Чухам энэ үеэс л тэд дэлхийн хэвлэл мэдээллийн нүдэнд өртөж эхэлсэн юм.

BTS-ийн Википедиа хуудаснаас та “анхны” хэмээх үгийг хайвал нийт 86 илэрц гарч ирдэг гээд бод доо. Шагнал авсны дараагаас тэд АНУ-ын нөлөө бүхий James Corden, Jimmy Kimmel, Ellen-ий зэрэг олон шоу нэвтрүүлэгт уригдсан. Тэд US BIllboard 200-ийн чартын нэгт бичигдсэн анхны Өмнөд Солонгосын хамтлаг болоод зогсохгүй топ 100 дууны жагсаалтын 10-т жагссан анхны амжилтын эзэд боллоо. Дэлхий даяар тэдний тоглолтын тов зарлагдсан даруйд билет нь зарагдаж дуусан, Лондоны Уэмбли цэнгэлдэхэд тоглолтоо хийсэн анхны Солонгосын уран бүтээлчид болов. Түүнчлэн Chainsmokers, Steve Aoki, Nicki Minaj, Ed Sheeran, Halsey зэрэг нэр бүхий уран бүтээлчидтэй хамтран дуу гаргасан нь ч онцлохуйц байв.

Байзаарай, гэхдээ яагаад BTS гэж?

BTS бол шинэ төрлийн Солонгос хамтлагийг үүсгэх асар том амбицдаа хөтлөгдсөн хөгжмийн зохиолч Бан Ши Хёкийн үүсгэн байгуулсан BigHit агентлагийн артистууд юм. Гарын таван хуруунд багтах цөөхөн дуучидтай, ард түмний дунд алдартай дуучин бараг байхгүй жижигхэн агентлагийн хувьд SM, YG, JYP-тай өрсөлдөхүйц хамтлаг гаргана гэдэг бас л зүүд мэт хэрэг байлаа. BTS дебют хийхээс жилийн өмнө бид багаараа ямар хамтлаг гаргах тухайгаа ярилцаж байжээ. Бан Ши Хёк хэлэхдээ "Бидний өмнө өнөөгийн залуус ямар төрлийн "баатар” хайж байгаа вэ? гэсэн асуулт тулгарсан. Оргил дээрээс ингэ, тэг хэмээн заах бурхан мэт баатрын оронд тэдэнд нэг ч үг дуугаралгүйгээр хэцүү үед нь хэнээс ч илүүгээр хажууд нь байх, уйлах үед нь мөрөө дэрлүүлэх тийм хүн хэрэгтэй хэмээн дүгнэлтэнд хүрсэн" гэжээ.

Гэхдээ тэдний од болох замнал тийм ч дардан байгаагүй юм. 2014 онд шоуны бичлэгэнд оролцохоор Америкт ирсэн хамтлагийн гишүүд үзэгч авчрахын тулд өөрсдөө гудамжинд гаран брошур тарааж, бидний тоглолтыг ирж үзээрэй хэмээн гуйж ядан урьж байсан нь саяхан. Гэсэн хэдий ч тэд жижиг агентлагийн жижиг хамтлаг гэдэгтээ гутрахын оронд түүнийгээ харин ч хүлээн зөвшөөрч, өөрсдөд тулгарч буй хэцүү бэрхшээлийг бүрэн ухамсарласнаа ил тодоор уран бүтээлдээ шингээн, мөн сошиал медиаг ашиглан фенүүдтэйгээ амьд харилцаа үүсгэж байлаа. Үүний үр дүнд тэднийг нэр алдарт хүргэсэн хамгийн эхний хит цомог “The Most Beautiful Moment in Life” хэмээх цомог гарсан юм. Энэ цомог хамтлагийн туулж өнгөрүүлж буй карьерын түүхийг уран яруу, зохиомжит хэлбэрээр илэрхийлсэн нь сонсогчдын талархлыг ихэд хүлээсэн билээ.

BTS дээрх элементүүдийг зохиогоогүй, анхлан үүсгээгүй. Big Bang зэрэг олон хамтлагт ижил төстэй олон чанар байсан. Гэхдээ BigHit-ийнхэн эдгээрийг BTS-ийн бүр оршин тогтнолын нэг хэсэг болгосноороо ялгарсан юм.

Тэдний дууны үгүүд хүсэл тэмүүлэл, алсын харааг нь хамгийн тодоор илэрхийлдэг.

Хэнд хандаж, яаж тайтгарахаа үл мэдэх бидний сэтгэлийн мухарт орших хар бодлууд, гутранги үзлийг тэд уран бүтээлдээ чимж хачирлалгүйгээр шулуухан илэрхийлж, тэд ч гэсэн бидэнтэй адил зовлон, бэрхшээлийг туулдаг гэдгээ үнэнээр харуулсан нь “төгс баримал” мэт байх ёстой хэмээн ухуулдаг К-попын хувьд цоо шинэ явдал байлаа. Уран бүтээлээрээ дамжуулан эерэг мессеж түгээхийн сацуу НҮБ-ын Хүүхдийн сантай хамтран “LoveMyself” кампанит ажлыг хэрэгжүүлэн мессежээ бодит өөрчлөлт болгон хувиргасан нь ч магтууштай явдал байв.

Өчигдөр би алдаа гаргасан байж болно. Тэгсэн ч гэсэн өчигдрийн би бол би. Өнөөдрийн би бол өдийг хүртэл гаргасан алдаатайгаа хамт алхах би. Маргааш магадгүй би арай ухаажих байх. Тэр ч гэсэн би. Миний ертөнцөд хамгаас тод гэрэлтэх одод болон хувирчихсан алдаа дутагдал болгон минь бас л би. Би өөрийгөө хэн байсан, хэн байгаа, хэн болох, хэн болохыг хүсэж байгаатай нь цөмийг нь багтаан хайрлаж сурсан. Би бол Би.

BTS хамтлагийн ахлагч Ким Нам Жүний UNICEF дээр тавьсан илтгэлээс

Өөрийгөө хайрлах бол өөрийгөө хөгжүүлэх гэсэн ойлголт түгээмэл тархсан нийгэмд бид амьдардаг. Номын хуудас эргүүлэх бүрд, телевизийн суваг эргүүлэх бүрд “Чадах хүртлээ чаддаг юм шиг дүр эсгэ” хэмээх үгс байнга сонсогдоно. Гэхдээ хүн байнга хүчтэй байх албагүй. Өөр хүн мэт дүр эсгэж, эсвэл ямагт сул тал байхгүй мэт харагдах нь алсдаа хор нөлөөтэй ч магадгүй.

BTS-ийн бусдад түгээх гэсэн мессеж ердөө л энэ байлаа. Алдаатайгаа ч чи, сул талтайгаа ч чи. Үүнээс зугтахын оронд үүнийгээ хүлээн зөвшөөрөн өөрийгөө хайрлах нь хамгаас чухал гэдгийг тэд бусдад түгээхийг хүсэж байв. "Миний ертөнцөд хамгаас тод гэрэлтэх одод болон хувирчихсан алдаа дутагдал болгон минь бас л би" хэмээх энэхүү ганц өгүүлбэр нь л тэднийг бусдаас өөр гэдгийг илтгэх шиг.

ИЙН ТЭД ӨӨРСДИЙН АРМИ, ФЕНДОМ ЕРТӨНЦИЙГ БҮТЭЭЖ ЧАДСАН ЮМ

BTS-ийн амжилтын тухай ярьж байгаа бол тэдний фэнүүдийг дурдахгүй өнгөрвөл нүгэл болно. Шагналын индэр дээр гарах бүрдээ тэдний марталгүй хийдэг үйлдэл бол фэнүүддээ талархах.

Өөрсдийгөө ARMY хэмээн нэрлэсэн тэдний шүтэн бишрэгчид BTS-ийг олон улсын тавцанд гаргахад агентлагаас нь дутахгүй хүчин зүтгэл гаргасан юм. Дэлхий дээрх бараг бүх фэн коммюнитиг бүрдүүлсэн Tumblr дээрх тэдний арми One Direction хамтлагийн оргил үетэй тэнцэхүйц. Сошиал медиа дээр, ялангуяа Твиттер дээр магадгүй тэднээс илүү идэвхтэй фэнүүд үгүй. Тийм ч учраас тэд 2017 оны 9 сард “хамгийн олон хандалттай”-тэй уран бүтээлчээр тодорсон аж. Тухайн үед тэдний нэг жиргээ ойролцоогоор 252,200 retweet-тэй байсан нь Гиннесийн номонд рекорд болон бүртгүүлэхэд хангалттай амжилт байв.

2015 он гэхэд тэдний тоглолтын шагласан билетийн үнэ 10,000$ давж байлаа. Дэлхийн алдарт уран бүтээлчдийн тоглодог Wembley, Citifield зэрэг томоохон цэнгэлдэх дэх тоглолтын билет нь хэдхэн минутын, заримдаа хэдхэн секундын дотор зарагдаж дуусдаг аж. Одоо тэдний аялан тоглолтын дундаж тасалбарын үнэ 452 америк доллар байдаг нь хамгийн үнэтэй гэсэн ангилалд багтана.

Тэдний тоглолтыг үзэхээр Citifield стадиумын гадаа майхан барин хүлээж буй фенүүдийн цуваа үргэлжилсээр ...

Сүүлийн жилүүдэд тэдний фэнүүд өөрсдийн коммюнитигээр дамжуулж сайн сайхны төлөө хамтран хүчин зүтгэл гаргадаг болсныг дурдууштай. Жишээлбэл 2018 онд, Erika Overton гэх фэн “One in an Army” хэмээх твиттер групп үүсгэж BTS-ийн фэнүүдээс хандив цуглуулан ТББ-уудад өгч эхэлсэн байна. Сүүлд гэхэд л тэд Thirst Relief хэмээх байгууллагаар дамжуулан цэвэр усны хүртээмж бага Танзани улсын иргэдэд ирэх 25 жилийн туршид ашиглахуйц хэмжээний ус шүүгч авч өгсөн аж.

Сүүлд л гэхэд BTS-ийн зүгээс #BlackLivesMatter хөдөлгөөнд 1 сая доллар хандивласан даруйд фенүүдийн зүгээс энэ мөнгийг дүйцүүлэхээр шийдэн #MatchAMillion хэмээх аяныг өрнүүлэн ердөө 24 цагийг дотор 817.000$-ийг цуглуулж тун удалгүй 1.000.000$ хүргэн давхар хандивласан юм. Тэдний бахдам үйлдлүүд үүгээр зогсоогүй ба рацист, тэрслүү үзлээр дүүрэн #WhiteLivesMatter зэрэг хаштагуудыг эзлэн авч тоймгүй постуудаар бөмбөгдөн буруу үзэл тээсэн постуудыг олж харагдахааргүй болтол нь дарж чаджээ.

Энэ мэтчилэн ARMY нарын хийж бүтээсэн, гүйцэтгэсэн зүйлс их бөгөөд BTS-ийн одоогийн амжилтын хамгийн том хөшүүрэг болсоор ирсэн билээ.

Тэдний "хэн ч биш" байхаасаа эхлүүлэн өдийг хүртэл фенүүдтэйгээ нэг гэр бүл мэт харилцаа үүсгэсэн нь өөр ямар ч хамтлаг, дуучдаас харах боломжгүй чанар байх. Ямар нэгэн хана байхгүй, яг л хажууд байгаа найз мэтээр өөрсдийн сошиал медиа болон тоглолт, уулзалтууд дээр ханддаг нь ARMY хэмээх BTS-ийн фэндом ийм хүчтэй байгаагийн гол нууц болов уу.

BTS-ийн фен Ч.Ану

ТЭГВЭЛ ТЭДНИЙ ҮНЭ ЦЭНИЙГ ХЭМЖИЖ БОЛНО ГЭЖ ҮҮ?

BTS-ийн нөлөө зөвхөн соёл урлаг, хүмүүнлэгийн үйлсээр хязгаарлагдахгүй юм. Тиймдээ ч тэдний гаргаж буй амжилт, үзүүлж буй үнэ цэнийг хэмжинэ гэдэг ярвигтай ажил.

2018 онд Hyundai Research Institute-ээс гаргасан судалгаагаар BTS жилд Өмнөд Солонгосын эдийн засагт 3.54 тэрбум доллартай тэнцэхүйц мөнгө оруулж ирдгээс гадна эдийн засгийн нэмэгдсэн үнэлэмж нь жилд 1.26 тэрбум доллар хэмээн үзсэн байна. Энэ нь дэлхийн топ авиа компаниудын нэгт тооцогдох Korean Air компанийн Солонгосын ДНБ-д оруулж буйтай тэнцэхүйц гэсэн үг. BTS-ийн амжилтын түүх бизнесийн сургуулиудын хичээлийн хөтөлбөрт кэйс болон орж, олон мянган хүн нөү-хауг нь ойлгох гэж хичээсээр.

Түүнчлэн BTS-ийн эдийн засагт үзүүлэх 10 жилийн нөлөө нь 49.8 тэрбум доллартай тэнцэнэ хэмээн үзэж байна. Энэ нь 41.6 тэрбум долларын нөлөөтэй байсан 2018 оны Пёнчаны Олимпыг ардаа орхих үзүүлэлт юм. Тиймдээ ч BigHit энэ ондоо багтаан 5 тэрбум доллараар үнэлэгдсэн IPO хийхээр зэхэж буй нь хэтрүүлсэн зорилго биш. Зорилгодоо хүрч чадвал тэд Солонгосийн хойгийн хамгийн үнэ цэнтэй энтертайнмент компани болох учиртай.

Үүгээр зогсохгүй аялал жуулчлал, өргөн хэрэглээний бараа бүтээгдэхүүн, дотоодын жижиг дунд бизнесүүд, хэл соёлын салбар зэрэг олон хүрээнд тэдний нөлөө нэвт шингэжээ. Одоо дэлхий даяар Солонгос гэхээр BTS-ээр төсөөлдөг бүтэн үе тасралтгүй нэмэгдсээр байна. Тоглолтыг нь үзэх гэж л Сөүлийг зорьдог, мерчандайзыг нь авах гэж онлайн дэлгүүрээр нь шагайдаг, цомгийг нь л сонсох гэж төлбөр төлдөг, шагналд л хүргэх гэж сошиал хэрэглэдэг фенүүдийн арми улам бүр хүчирхэгжсээр.

төгсгөл

Дуу хөгжимтэй холбоотой рекордууд үргэлж шинээр тогтоогдож эвдэгдэж байдаг. Одод төрдөг, одод буцдаг. Зарим нь аажим, зарим нь гэнэтхэн л бүдгэрнэ. Гэвч нэг улсын эдийн засаг, соёлд ийм хэмжээний нөлөө үзүүлсэн уран бүтээлчид дэндүү ховор төрдгийг төгсгөлд нь дурдах учиртай биз ээ.

BTS бол хоромхон хугацаанд харваад өнгөрөх зуурдын од биш, харин уран бүтээл, үйл хөдлөлөөрөө урам зориг, хүсэл тэмүүллийг түгээж, үе дамнуулан өвлүүлэх манай үеийн баатрууд билээ.

BTS