Монгол уншигчдын номын тавиур өнгөрөгч аравдугаар сард олон сонирхолтой шинэ бүтээлүүдээр баяжлаа. Дэлхийн алдартай зохиолчдын шилдэг номнууд монгол хэлнээ орчуулагдан, уншигчдад түүх, гүн ухаан, уран зөгнөл, хүүхдийн зохиол, хувь хүний хөгжил зэрэг олон аяллыг нээх боломжийг олгож байна.

Ж.К. Роулингийн ид шидийн ертөнц, Фрэнсис Фукуяамагийн улс төрийн бодрол, Юваль Ной Хараригийн хүн төрөлхтний түүхийг сонирхолтойгоор тайлбарласан бүтээл зэрэг олон талын номууд энэ удаагийн жагсаалтад багтсан. Мэдлэгээ тэлж, шинэ санаа олж авахыг хүссэн хүн бүрд эдгээр бүтээлүүд үнэ цэнтэй хөрөнгө оруулалт болох нь дамжиггүй.

1. хогвартс дахь зул сарын баяр 


Номын төрөл: Хүүхдийн уран зохиол
Зохиолч: Ж.К.Роулинг
Эрхлэн гаргасан: Жангар хүүхдийн редакц
Нүүрний тоо: 48

Харри Поттерийн хувьд зул сарын баяр нь зүгээр нэг баярын өдөр бус гэр бүл, халамж, жинхэнэ нөхөрлөлийн утга учрыг мэдэрч, дулаан сэтгэлийн үнэ цэнийг ухааруулах онцгой мөч байдаг билээ. Бага наснаасаа хайраар дутаж өссөн Харри Хогвартсд ирснээр анх удаа зул сарын баярыг жинхэнэ утгаар нь мэдэрдэг шүү дээ.

Молли Уизлигийн өөрийн гараар нэхсэн дулаахан цамц, Хагридын үнэнч сэтгэлийн илэрхийлэл болсон модон бүрээ, үл үзэгдэгч нөмрөг зэрэг бэлгүүд түүнд өөрийгөө аз жаргалтай, халамжтай ертөнцөд байгаа мэт мэдрэмжийг анх удаа төрүүлдэг. Тиймдээ ч Харри Поттер цувралын хамгийн сэтгэл бүлээцүүлэм, дулаахан хэсгүүд зул сарын баяртай холбогддог.

Энэхүү зурагт ном нь Ж.К. Роулингийн "Харри Поттер ба Философийн чулуу" зохиолоос авсан эшлэл, агуулгуудыг Зиеи Гаогийн үзэсгэлэнт зурагнуудын хамтаар зул сарын баярыг Хогвартс хэрхэн тэмдэглэн өнгөрүүлдэг болохыг дүрслэн харуулжээ. Ойртон ирж буй шинэ жилийн баярт зориулан энэхүү номыг багачуудад өгөх бэлгийн жагсаалтдаа заавал нэмээрэй.

Үнэ: 29,900₮
Онлайнаар захиалах

2. дийлдэшгүй хүн төрөлхтөн: ДЭЛХИЙ ЕРТӨНЦ ЯАГААД ШУДАРГА БУС БАЙДАГ ТУХАЙ


Номын төрөл: Хүүхдийн уран зохиол
Зохиолч: Юваль Ной Харари
Эрхлэн гаргасан: Жангар хүүхдийн редакц
Нүүрний тоо: 160

Дэлхийн нэрт түүхч, философич, зохиолч Юваль Ной Харари дэлхий даяар шуугиан тарьсан Sapiens бүтээлийнхээ гол санааг залуу уншигч, бага насны хүүхдүүдэд зориулан “Unstoppable Us” хэмээх нэртэй цуврал ботиуд болгон хүргэж буй.

“Unstoppable Us, Volume 1: How Humans Took Over the World” эхний номондоо зохиолч хүн төрөлхтний үүсэл хөгжлийг сонирхолтой, ойлгомжтой байдлаар дүрсэлсэн. Чухам Homo sapiens-ийн ямар чадвар тэднийг Homo Erectus, Neanderthal бусад хүний төрөл зүйл болон хөхтөн амьтдаас онцгойруулж, эх дэлхийг бүхэлд нь эзэгнэх хүч чадал өгсөн тухай хүн төрөлхтний түүхийг сонирхолтой, энгийн хэллэгээр уг зурагт номдоо өгүүлсэн юм.

Харин “Unstoppable Us” цувралын хоёр дахь дэвтэр буюу “Дэлхий ертөнц яагаад шударга бус байдаг тухай” номдоо тэрээр анчин, түүвэрлэгч байсан бидний өвөг дээдэс яаж тосгоны тариаланч болсон тухай, яагаад хаант улсууд, хууль тогтоомжууд бий болсон талаар тайлбарласан аж.

Хорвоо ертөнцийн үүсэл, хүн төрөлхтний түүхийн тухай дуусашгүй олон асуултаар өдөр бүхэн таныг булдаг сониуч бяцхан үрстэйгээ энэхүү номыг хамтдаа уншихыг зөвлөе. Тэдний яагаад? гэх олон асуултын хариу энд байгаа нь лавтай.

Үнэ: 24,900₮
Онлайнаар захиалах

3. ТҮҮХИЙН СУРГАМЖУУД 


Номын төрөл: Дэлхийн түүх
Зохиолч: Ариэл Дурант
Эрхлэн гаргасан: Монсудар хэвлэлийн газар
Нүүрний тоо: 184

Түүх, философийн салбар дахь өнгөрөгч зууны хамгийн даацтай бүтээлүүдийн нэг болох “The Lessons of History” монгол хэлнээ хэвлэгдэн гарчээ. “Түүхийн сургамжууд” хэмээн монголоор орчуулсан тус бүтээл нь зохиолч Вилл ба Ариэл Дурант нарын түүхэнд тэмдэглэгдэн үлдсэн томоохон үйл явдлуудын тухай өөрсдийн харах өнцгийг эсээ болгон бичсэн ном бөгөөд 1968 онд баримтат бүтээлийн төрөлд Пулитцерийн шагнал хүртсэнээрээ алдартай. Мөн зохиолчид уг бүтээлээрээ 1977 онд Ерөнхийлөгчийн нэрэмжит эрх чөлөөний одонгоор шагнуулсан юм.

Газар зүй, биологи, үндэстэн, характер, ёс суртахуун, шашин, эдийн засаг, социализм, засаглал, дайн, хөгжил дэвшил ба доройтол зэргээр хүн төрөлхтний түүхийг олон талаас нь задлан шинжилснээрээ энэхүү ном нь нийгмийн ухааны төдийгүй философийн бүтээл хэмээн үнэлэгддэг аж.

Үнэ: 19,900₮
Онлайнаар захиалах

4. МОНГОЛЫН ГЭЭГДСЭН ТҮҮХ-3


Номын төрөл: Монголын түүх
Зохиолч: Ё.Отгонбаяр
Эрхлэн гаргасан: Нэпко хэвлэлийн газар
Нүүрний тоо: 226

Сүүлийн жилүүдэд түүхч Ё. Отгонбаяр “Монголын гээгдсэн түүх” нэртэй YouTube сувгаараа дамжуулан Монголын түүхийн олон баримтыг ил болгож, бидний тэр бүр мэддэггүй, мартагдсан үйл явдлуудыг дэлгэснээр үзэгчдийн дуртай түүхийн суваг болсон билээ.

Түүний нэвтрүүлэгт Монголчууд тахлыг зэвсэг болгон ашигласан гэх ташаа ойлголт, Өгэдэйн улсыг сэргээхийн тулд Хубилай хааны эсрэг насан туршдаа тэмцсэн Хайду хан, хээрээр тэнэж явсан дээрэмчнээс Дундад болон Баруун Азийг чичрүүлсэн эзэнт гүрнээ байгуулсан Доголон Төмөр хаан, ХХ зууны эхээр Дундад Иргэн улсын эсрэг зэвсэг барьж тэмцсэн монголчуудын тухай сонирхолтой баримтууд багтдаг. Мөн хүүгээ золиослон Өвөр Монголоо тусгаарлахыг зорьж, насан туршдаа гянданд хоригдсон Дэмчигдонров вангийн гунигт түүх, Алтайн казахуудын тэмцэлд гар бие оролцож явсан Оспан баатрын хувь заяа зэрэг түүхийн хуудсуудыг амилуулж, олон үзэгчдийн шимтэн үздэг түүхийн санг бүтээгээд буй.

Тэгвэл эдгээр түүхэн баримтуудаас сэдэвлэн бичсэн түүний “Монголын гээгдсэн түүх-3” ном өнгөрсөн сард уншигчдын гарт хүржээ. “Түүхийг мэддэггүй хүн үлгэрт итгэдэг, үлгэрт итгэдэг хүнд үлгэр зохиогчид тасардаггүй” хэмээх үг бий. Монголчуудын байлдан дагууллын түүхийг гаднын өнцгөөс, өөрсдөд ашигтай байдлаар тайлбарласан олон бүтээл шил дараалан хэвлэгдэж байгаа өнөө цагт бид өөрсдийн түүхээ үнэн зөв, гүнзгий ойлгох нь туйлын чухал юм.

Үнэ: 48,000₮
Онлайнаар захиалах


5. монгол хэлэнд нэвтэрсэн зээлдмэл үгийн тайлбар толь


Номын төрөл: Толь бичиг
Зохиолч: Баабар
Эрхлэн гаргасан: Нэпко хэвлэлийн газар
Нүүрний тоо: 346

“Энэхүү тольд өнөөгийн дундаж монгол сэхээтэн ойлгодог, хэрэглэдэг таван мянга орчим зээлдмэл үг сонгож, аль хэлнээс гарвальтай, цаашлаад ямар хэлнээс угшилтай зэргийг тодорхойлов. Улмаар үгийн шууд утга нь юу гэж байсан хийгээд монгол хэлэнд нэвтрэхдээ ямар утга агуулах болсныг тодруулах оролдлого хийлээ.

Зээлдмэл үгийн уг сурвалж нь уг хэлээрээ хэрхэн бичигддэгийг эхээр нь олж тавьсан. Иймээс зөвхөн үсгийн тэмдэгт гэхэд латин, герег, кирил, хятад ба япон ханз, солонгос, санскрит, араб ба перс, руин зэрэг арав гаруй төрлийн үсэг тэмдэгтээс бүрдэв. Бүх амьтан, ургамлын зээлдмэл нэрийг шинжлэх ухааны латин нэршлээр бичиж хавсаргасан.” хэмээн зохиолч Баабар шинэхэн бүтээлээ тодорхойлжээ.

Үнэ: 68,750₮
Онлайнаар захиалах

6. түүхийн төгсгөл ба сүүлчийн хүн


Номын төрөл: Эдийн засаг
Зохиолч: Фрэнсис Фукуяама
Эрхлэн гаргасан: Нэпко хэвлэлийн газар
Нүүрний тоо: 504

Фрэнсис Фукуяама Стэнфордын Их Сургуулийн Олон Улсын Судалгааны төвд профессор, судлаачийн албан тушаал хашиж, улс төрийн хөгжил, төрийн институцуудын чадавх, нийгмийн итгэлцэл, капитализм ба ардчиллын харилцан хамаарал зэрэг сэдвүүдээр судалгаа хийдэг Америкийн улс төр судлаач, философич нэгэн юм.

Түүний "Түүхийн төгсгөл ба Сүүлчийн хүн" бүтээл нь либерал ардчилал хүн төрөлхтний нийгэм-соёлын хөгжлийн эцсийн цэг байж болох тухай сонирхолтой санааг дэвшүүлдэг.
1992 онд хэвлэгдсэн энэ бүтээл Хүн төрөлхтний түүхэнд чиглэл байдаг уу? Хэрэв түүх чиглэлтэй юм бол ямар төгсгөл рүү явж байна вэ? “Түүхийн төгсгөл”-тэй жишихэд бид одоо хаана байна? хэмээх асуултаар эхэлнэ. Харин энэхүү асуултдаа Ф. Фукуяама коммунизмын уналт, Барууны ардчилсан засаглалын өсөлтөөр дамжуулан хүн төрөлхтөн “түүхийн төгсгөл”-д буюу үзэл санааны тогтвортой байдалд хүрсэн хэмээн хариулсан билээ.

Тэрчлэн Фукуяама түүхэн зөрчилдөөнийг философийн үүднээс авч үзэж, либерал ардчилал нь хүний эрх чөлөө, хүлээн зөвшөөрөгдөх хүсэл, тэгш эрхийн хэрэгцээг хангаж чадах систем гэж онцолсон байдаг. Гэхдээ үүний сацуу тэрээр энэ системд ирээдүйд тохиож болох сорилт, эрсдэлийн талаар мөн анхааруулахаа мартаагүй юм. Орчин үеийн улс төрийн философийн талаар товч бөгөөд тодорхойгоор ойлгохыг хүсэж буй уншигчдад ардчилал, үзэл суртал, хүний хөгжил зэрэг өргөн хүрээг хамарсан уг бүтээлийг санал болгож байна.

Үнэ: 60,000₮
Онлайнаар захиалах

7. жоржийн гайхамшигт бэлдмэл 


Номын төрөл: Хүүхдийн уран зохиол
Зохиолч: Роалд Дал
Эрхлэн гаргасан: Нэпко хэвлэлийн газар
Нүүрний тоо: 98

"Чарли ба Шоколадны Үйлдвэр," "Матильда," "Агуу Найз Лекарь" болон "Аварга тоор" зэрэг зохиолуудаараа дэлхийн сая сая багачуудын хамгийн хайртай зохиолч болсон Британийн зохиолч Роалд Далийн “Жоржийн гайхамшигт бэлдмэл” хэмээх бүтээлийг Нэпкогоос бяцхан уншигчдын гарт хүргэжээ.

Дэлхийн II дайны үеэр тулаанч нисгэгчээр ажиллаж байгаад зохиолчийн замналаа эхлүүлсэн түүний бүтээлүүд өвөрмөц дүрүүд, уран сэтгэмжит үйл явдлууд, хошин өнгө аяс болон эр зориг, энэрэл, шударга ёсны сэдвийг хөнддөгөөрөө алдартай.

Үнэ: 18,750₮
Онлайнаар захиалах

8. анхаарлын өөрчлөлттэй хүүхдүүдэд зориулсан мэдрэлийн сэтгэл судлалын бүлгийн хөтөлбөр 


Номын төрөл: Сэтгэл судлал
Зохиолч: Клаус Жейкобс, Франц Петерман
Эрхлэн гаргасан: Psychology publishing

Хүүхдийн сурч боловсрох, танин мэдэх үйл ажиллагаанд гол чиглүүлэгч болсон “анхаарлын тухай асуудал" нь сүүлийн жилүүдэд судлаачдын сонирхлыг ихээхэн татах болж, мэдрэлийн сэтгэл судлал болон танин мэдэхүйн сэтгэл судлалын хүрээнд судлагдаад багагүй хугацаа өнгөрсөн билээ.

Шинээр хэвлэгдэн гарсан энэхүү бүтээлд дурдагдсан анхаарлыг хөгжүүлэх хөтөлбөр нь мэдрэлийн сэтгэл судлалын зарчимд тулгуурласан зан үйлийн заслын хэлбэр бөгөөд Европын орнуудад амжилттай хэрэгжиж байгаа аж. Сэтгэл судлалын салбар ялангуяа хүүхэдтэй ажилладаг сэтгэл зүйч нарт уг бүтээлийг санал болгож байна.

9. хайр 


Номын төрөл: Уран зохиол
Зохиолч: Женет Уинтерсон
Эрхлэн гаргасан: Болор Судар хэвлэлийн газар
Нүүрний тоо: 155

"Болор судар" хэвлэлийн газар Английн Penguin хэвлэлийн газраас эрхлэн гаргадаг "Vintage Minis цувралыг монгол хэлнээ орчуулан “Агуу санаа" нэрийн дор уншигчдадаа хүргэж байгаа билээ. Тус цуврал дэлхийн суут зохиолчдын оюуны охийг дээжлэн авч, сэдэвчлэн зангидаж, хүнийг хүн болгодог сэдвүүдэд хөтөлснөөрөө онцлог. Өдөр бүр авч явахад эвтэйхэн, өнгөлөг, сонирхолтой энэ жижигхэн номууд танд хүний амьдралын төрөхөөс үхэх хүртэлх бүхий л сэдвийн талаар илэн далангүй хүүрнэнэ.

“Агуу санаа” цувралаар уншигчдын хүртээл болсон бүтээлүүд:

1. Виржиниа Вүүлф "Халдашгүй эрх"

2. Луиза Мэй Олкотт "Эгч дүүс"

3. Жэйн Остин "Гэрлэлт"

4. Зигмунд Фройд "Зүүд"

5. Артур Конан Дойл "Аллага"

6. Оскар Уайлд "Худал"

7. Ричард Райт "Ялгаварлал"

8. Маргарет Этвүүд "Эрх чөлөө"

9. Женет Уинтерсон "Хайр"

Үнэ: 15,000₮
Онлайнаар захиалах

10. дракула


Номын төрөл: Хүүхдийн уран зохиол
Зохиолч: Брам Стокер
Эрхлэн гаргасан: Эрдэмт Паблишинг
Нүүрний тоо: 128

“Жонатан Харкерын Румын улс дахь энэ томилолт жирийн нэгэн аялал болох ёстой байв. Гэвч түүний очсон Дракулагийн цайз нууцлаг зүйлсээр дүүрэн. Төөрдөг байшин шиг асар том мөртөө эзэн нь зөвхөн шөнийн харанхуйд гарч ирдэг, харин өдөр нь хүйтэн хонгилд гүн нойронд автан унтдаг байв! Жонатан Англи руу буцахыг маш их хүссэн ч эхлээд цайзаас чимээгүйхэн зугтаж, гүн Дракула дагахгүй байгаасай гэж залбирах хэрэгтэй.”

Эрдэмт хэвлэлийн газраас эрхлэн гаргаж буй хялбаршуулсан сонгодог зохиолууд цуврал нь Дракула, Франкенштейн, Гэм Зэм зэрэг дэлхийд хэдийнээ алдаршсан бүтээлүүдийг долоогоос дээш насны хүүхдэд зориулан хялбаршуулж зургаар баяжуулсан хувилбарууд юм. Энэхүү хялбаршуулсан зохиолууд нь бага ангийн сурагчдыг зурагт номоос бүлэгт ном руу шилжихэд тус дэм болохын зэрэгцээ давтагдашгүй сонирхолтой үйл явдал нь тэдэнд унших дадлыг суулгахад туслах нь гарцаагүй.

Үнэ: 15,000₮
Онлайнаар захиалах

11. эрх чөлөө


Номын төрөл: Уран зохиол
Зохиолч: Маргарет Этвүүд
Эрхлэн гаргасан: Болор Судар хэвлэлийн газар
Нүүрний тоо: 182

Агуу санаа цувралаас онцлох дараагийн бүтээл бол Маргарет Этвүүдийн “Эрх чөлөө.”
Тэрээр зохиолууддаа хүн төрөлхтний эрх чөлөө болоод эрх чөлөөгүйн асуудлыг хэд хэдэн бүтээлдээ хөндсөнөөс хамгийн алдартай нь олон улсад хэдэн сая хувь борлогдсон “Шивэгчний үлгэр” роман билээ.

1985 онд анх хэвлэгдсэн уг ном Доналд Трампийг 2016 онд АНУ-ын Ерөнхийлөгчөөр сонгогдсоноос хойш уншигчдын анхаарлыг ихэд татаж, Hulu-ийн бүтээсэн ижил нэрт тв цуврал нь 69 дэх удаагийн Эммид "Шилдэг драмын цуврал" төрөлд ялалт байгуулж, тухайн жилдээ нийт найман Эмми хүртсэн юм. Энэхүү “Эрх чөлөө” номд түүний зохиолууд дээр гардаг эрх чөлөөний тухай ойлголтыг нэгтгэсэн гэдгээрээ онцлог.

“Эрх чөлөө гэж чухам юуг хэлнэ вэ? Миний 1985 оны роман “Шивэгчний үлгэр”-ийн Лидия эгч эрх чөлөөгөө хасуулсан шивэгчдэд “Эрх чөлөөнд хүрэх хийгээд эрх чөлөөнөөс ангижрах гээч нь хоёр ондоо зүйл. Анархийн эрин үед хэн ч эрх чөлөөнд хүрэх гэж тэмүүлнэ. Харин одоо та нарт эрх чөлөөнөөсөө ангижрах боломж байна. Ийм боломжийг бүү алд” гэж хэлдэг юм.” Маргарет Этвүүд

Үнэ: 15,000₮
Онлайнаар захиалах

12. манханы хүүхдүүд 


Номын төрөл: Уран зөгнөлт
Зохиолч: Фрэнк Хэрберт
Эрхлэн гаргасан: Болор Судар хэвлэлийн газар
Нүүрний тоо: 551

"Children of Dune" бол Фрэнк Хербертийн Dune цувралын гурав дахь роман бөгөөд 1976 онд хэвлэгдсэн шинжлэх ухааны уран зөгнөлт бүтээл юм. Энэ роман анх Analog Science Fiction and Fact сэтгүүлд цувралаар нийтлэгдэж байжээ.

"Dune Messiah" романы төгсгөлд Пол Атрейдес хараагүй болсон ч хүйтэн элсэн цөл рүү явж, ихэр хүүхдүүд болох Лето II, Гханима нарыг Фременүүдийн хамгаалалтад үлдээдэг. Полын дүү Алия эзэнт гүрний регент болж засаглах бөгөөд энэ үеэр Коррино овог хаан ширээнд дахин суухыг санаархана. Бене жессеритийн эгч дүүс мөн Тлейлаксу болон Сансрын Гильдтэй холбоотон болж, “spice”-ийг хяналтыг гартаа оруулахын тулд Полын хүүхдүүдийг олзлохыг хичээснээр үйл явдал өрнөнө.

Энэхүү роман анхны хэвлэлээрээ 75 мянга гаруй хувь борлогдож, шинжлэх ухааны уран зөгнөлт бүтээлийн хамгийн анхны бестселлер болсон түүхтэй. Сонирхуулахад, 1977 онд Хьюго шагналын "Шилдэг роман" төрөлд нэр дэвшсэн тус бүтээлийг 2003 онд Sci-Fi Channel суваг Dune Messiah романы хамт "Frank Herbert's Children of Dune" нэртэй мини цуврал болгож, дэлгэцнээ амилуулж байжээ.

Үнэ: 29,000₮
Онлайнаар захиалах

13. дурлалын таамнал 


Номын төрөл: Уран зохиол
Зохиолч: Али Хэйзелвуд
Эрхлэн гаргасан: Болор Судар хэвлэлийн газар
Нүүрний тоо: 519

"The Love Hypothesis" роман нь залуу эрдэмтэн Олив Смитийн хайр дурлалын тухай түүхийг өгүүлдэг. Оливийн хайр дурлал, амьдралын асуудлуудыг шийдвэрлэхийн тулд тэрээр хуурамч болзоонд оролцохоор шийддэг бөгөөд энэ нь нэр хүндтэй, хүйтэн зантай профессор Адам Карлсонтой холбогдоход хүргэдэг.

Эрдэм шинжилгээний салбарт амжилт гаргахын тулд зорилго тавьсан Оливийн хувьд Адамтай хийсэн "хуурамч" харилцаа нь жинхэнэ мэдрэмж болж хувирдаг. Тэрээр энэ харилцаанаас жинхэнэ хайр, өөрийгөө танин мэдэхэд хүрдэг. Энэхүү роман нь шинжлэх ухаан, хайр дурлал, өөрийгөө олох гэсэн сэдвийг хөндсөн, сэтгэл татам бөгөөд хөгжилтэй зохиол юм.

Үнэ: 29,000 ₮
Онлайнаар захиалах

14. гурван намраас урт ганц өдөр 


Номын төрөл: Уран зохиол
Зохиолч: Лиү Жэньюнь
Эрхлэн гаргасан: Num Publishing
Нүүрний тоо: 522

Сүүлийн жилүүдэд бидэнд Мо Янь, Үй Хуа, Лю Цысинь зэрэг урд хөршийн орчин цагийн алдартай зохиолчдын бүтээлүүдтэй эх хэлээрээ танилцах завшаан гарч буй. Тэгвэл энэхүү жагсаалтад өнгөрөгч сараас Лиү Жэньюн зохиолч орж ирлээ.

Лиү Жэньюн бол орчин үеийн Хятадын нийгмийг хошин өнгө аяс, реализм хослуулан дүрсэлсдгээрээ алдаршсан нэгэн. 1958 онд Хэнань мужийн Янжин хошуунд төрсөн Люгийн хөдөө орон нутагт өнгөрүүлсэн бага нас болон Ардын чөлөөлөх армид алба хаасан туршлага нь түүний уран зохиолын хэв маягт гүн нөлөө үзүүлсэн хэмээдэг.

2011 онд “ Someone to Talk To” романаараа Хятадын утга зохиолын хамгийн том шагнал болох Мао Дуны уран зохиолын шагналыг хүртэж байсан түүний хамгийн сүүлийн үеийн уран бүтээл " Гурван намраас урт ганц өдөр" роман өнгөрөгч сард монгол хэлнээ хэвлэгдсэн юм.

Зохиолч Лиү Жэньюнь " Гурван намраас урт ганц өдөр" романдаа Яньжинь хэмээх бяцхан суурингийн эгэл дорд хүмүүсийн өнгөрсөн зууны 60-аад оноос энэ зууны 2000-аад оны үеийн амьдралын ээдрээтэй, гунигтай түүхийг суурь дэвсгэр болгон, уран сэтгэмж буюу ид шид , бодит ахуй буюу хүмүүний ертөнцийн адармаат амьдралыг сүлэлдүүлэн, хүн чанар, хүний хувь төөрөг, оршихуйн утга учрыг "хар бараан хошин шог"-оор дэлгэн өгүүлжээ. Уг роман нь одоогийн байдлаар зөвхөн дотооддоо гэхэд 350 мянган хувь борлогдсон амжилт үзүүлжээ.

Үнэ: 35,000₮
Онлайнаар захиалах

15. шим тэжээл 


Номын төрөл: Хувийн эрүүл мэнд
Зохиолч: Б.Билгүүн
Нүүрний тоо: 208

Органик химич, доктор Б.Билгүүний бичсэн уг ном нь танд эрүүл хооллолтын ертөнц болон макро болон микро элементүүдийн чухал үүргийн талаар энгийнээр илүү гүнзгий ойлголт өгөх зорилготой. Өдөр тутамдаа хэрэглэх хүнсний сонголтоор дамжуулан таны сайн сайхан эрүүл байдлыг нэмэгдүүлэх төдийгүй өвчнөөс урьдчилан сэргийлэх, эмчлэх ойлголтыг бий болгоход туслах зорилготой уг бүтээлийг эрүүл мэндийн амьдралын хэв маяг цогцлоохыг хүсэж буй хэн бүхэнд санал болгож байна.

Үнэ: 60,000₮
Онлайнаар захиалах