Энэхүү нийтлэл нь Гэж Юу Вэ? сэтгүүлийн 2025 оны хаврын дугаарт багтсан бөгөөд бид тус сэтгүүлийн нийтлэлүүдийг цувралаар уншигч та бүхэнд хүргэж байна. Алдаж боломгүй агуулгуудыг шимтэн уншаарай. Мөн ЭНД дарж гурав дахь дугаарыг урьдчилан захиалах боломжтой.


ФИЗИКИЙН ТЭНГЭРТ ХУРАЛДСАН ҮҮЛС

XIX зууны төгсгөл үеийн эрдэмтэд тэр дундаа физикийн шинжлэх ухааны салбарын эрдэмтэд орчлон ертөнц дээрх бараг бүхий л зүйлсийг нээчихлээ хэмээн бардамнах аястай байжээ. Алдарт физикч Лорд Келвин нэгэн эрдэм шинжилгээний хурлын үеэр, "Бид бараг л бүхнийг мэддэг болчихсон. Өдгөө физикийн хөх тэнгэрт хуралдсан багахан үүл л сарничихвал бид бүхнийг мэддэг боллоо" гэж бахдангуй тунхаглаж байв. Гэтэл Келвиний тодорхойлсон "багахан хуралдсан" үүлс нь орчин үеийн физикийн тулгын чулуу болсон юм. Улмаар XIX зууны төгсөлд физикийн шинжлэх ухаанд гэрлийг тойрсон хачирхалтай ажиглалтууд бүртгэгдэв.

Майкелсон-Морли нарын туршилт

Гэрэл долгион аваас ямар нэг орчинд тархах ёстой. Учир нь долгион бол хэлбэлзэл орчинд тархах үзэгдэл билээ. Жишээ нь дууны долгион орчин (агаар) байхгүй бол тархах боломжгүй. Хэрвээ энэ үнэн бол гэрлийн хурд түүнтэй харьцангуй ажиглагчийн хөдөлгөөнөөс хамаарч өөр өөр бүртгэгдэх ёстой. Ажиглагч гэрлийн өөдөөс хөдөлж байвал өөрийн хурдыг гэрлийн хурд дээр нэмэгдсэнээр, харин гэрлийн эсрэг зүг хөдөлж байвал хасагдсанаар нь хэмжинэ. Гэтэл Майкелсон-Морли нарын туршилтаар гэрлийн хурд ажиглагчийн хөдөлгөөнөөс үл хамаарч үргэлж тогтмол байв.



хар биеийн цацаргалт

Биес халахаараа дулаан цацаргадаг. Дулааны цацаргалтын энерги нь гэрлийн далайцаас хамаарах ёстой. Учир нь гэрэл бол долгион. Гэтэл туссан бүх гэрлийг ойлголгүй шингээдэг абсолют хар биеийг (жишээ нь халуун савны дотор бараг л гэрэл гарахгүй учир хар бие юм) хэт халааж, түүнээс цацрах гэрлийн энергийг хэмжсэн хэмжилтүүд тухайн үеийн дулааны цацаргалтын онолоос эрс зөрж байв. Хэрвээ онолын таамаглал үнэн бол хэт халсан бие өөрөөсөө хязгааргүй энерги цацаргах ёстой. Өөрөөр хэлбэл, хэт халсан бие хэт ягаан гэрлийн мужид хязгааргүй их энерги ялгаруулах ёстой гэсэн үг. Гэхдээ ийм байх боломжгүй. Уг онол, туршилтын зөрүүг "хэт ягаан сүйрэл" хэмээн нэрлэжээ.


Эдгээр асуудал нь Келвиний тодорхойлсон "Хуралдсан багахан" үүлс байсан бөгөөд тухайн үед цоо шинэ эрин үүгээр эхэлж буйг хэн ч зүүдлээгүй болов уу. Гэрлийн хурд ажиглагчаас үл хамаарч тогтмол байх онолыг Альберт Эйнштейн бие даан боловсруулсан нь Харьцангуйн Онолын үндэс болсон бол хэт ягаан сүйрлийн тайлбар нь квант физикийн шавыг тавьсан юм.

XX зууны эхлэл 1900 он. Германы физикч Макс Планк хэт ягаан сүйрэл буюу хар биеийн цацаргалтын асуудлыг тайлбарласан эрдэм шинжилгээний өгүүллээ "Annalen der Physik" сэтгүүлд хэвлүүлжээ. Планк өөрийн өгүүлэлдээ h гэх тогтмолыг шинээр оруулж ирсэн бөгөөд гэрэл тасралтгүй бус харин өөрийн давтамжид харгалзах "квант" энергитэй гэж үзсэнээр хэт ягаан сүйрлийг аврав. Өөрөөр хэлбэл, гэрлийн энерги нь далайцаас бус "квант" гэх багц, багцаас хамаарах ёстой.

"Хар биеэс цацрах гэрлийн энерги нь тасралтгүй нэгэн төрөл бус. Харин "багц, багцаар" буюу "квант, квант"-аар л цацрах боломжтой."

Планк өөрийн ажилд хар биеэс цацрах гэрлийн энерги нь давтамжтайгаа дараах томьёогоор холбогдоно гэв:

E = hv

Энд h нь Планктын тогтмол бөгөөд орчин үеийн физикийн суурь (фундаменталь) тогтмолуудын нэг, v нь гэрлийн давтамж.Дээрх томьёог шинжилбэл хоёр өөр давтамж хоорондын энергийн зөрүү нь ойролцоогоор Планкийн тогтмолтой шууд хамааралтай болно. Үүнээс бага энергийн хэмжээ байх боломжгүй ба нэг квант гэдэг нь нэг багц гэсэн утгатай бөгөөд нэг квантаас жижиг хэмжээ гэж үгүй. Лего тоглоомтой төстэй хэмээн ойлгож болно. Легогоор байшин барихад хамгийн жижиг "лего-тоосго" гэж бий. Юу ч хийсэн бай хамгийн жижиг нь нэг лего-тоосгоны л хэмжээтэй бөгөөд эдгээрийг хооронд нь өрөх замаар юуг ч барих боломжтой. Үүний адилаар байгальд хамгийн бага энергийн хэмжээ гэж байх ба үүнээс бусад бүх зүйл "өрөгдөж" бий болдог ажээ. Планк үүнийгээ "Математик заль" гэж үзсэн учраас түүний ажлыг физикийн нээлт хэмээн хүлээж авсан хүн цөөн байв. Гэсэн хэдий ч тэдгээр цөөхөн хүмүүсийн нэг нь ердөө 26-хан настай, дөнгөж дүрэлзэж эхэлсэн од Альберт Эйнштейн байлаа.1905 онд Эйнштейн Берлиний их сургуульд өлгийдөж аваад удаагүй асан Харьцангуйн Тусгай Онол (х.т.о)-ын тухай лекц уншихаар уригдсан ч үүнийхээ оронд фотоэлектрик үзэгдлийг Планкийн "квантын" санаанд үндэслэн хэрхэн тайлбарлаж болох тухай хурсан олонд танилцуулжээ. Мөн онд Планкийн судалгааны ажлаа хэвлүүлсэн өнөөх "Annalen der Physik" сэтгүүлд өөрийн санааг "Гэрлийн хувиргалтын тухай шинэ үзэл" нэрээр хэвлүүлсэн юм. Эйнштейн гэрлийн квантыг фотон хэмээх бөөм гэж үзсэнээрээ Планкийн санаа ердөө математик аргачлал төдий бус харин түүнд нь цоо шинэ ертөнц нуугдаж буйг илчилсэн билээ.


Макс Планк


Физикт КВАНТ шинээр хүч түрэн орж ирэв. Энерги, импульс бидний харж төсөөлдөг шиг тасралтгүй үргэлжилсэн бус харин ширхэг ширхгээр буюу квант, квантаас тогтоно гэх хувьсгалч санааг залуу үеийн физикч нар өлгийдөн авчээ. 1913 онд Нильс Бор, Эрнест Резерфордын туршлага дээр үндэслэн Борын устөрөгчийн атомын загварыг бүтээв. Борын атомын загвараар электрон дурын энергийн түвшинтэй бус тасралттай, зөвшөөрөгдсөн төлөвүүдэд л орбитлон орших боломжтой хэмээснээр устөрөгчийн атомын нууцыг нээсэн юм. Үүний дараа 1924 онд язгууртан гаралтай, физикийн шинжлэх ухааны хорхойтон гүн Луй Де Бройл өөрийн докторын ажилд матери бол бөөмлөг ба долгиолог гэсэн хос шинж чанартай болохыг таамаглаж, ердөө хоёрхон жилийн дараа Эрвин Шрёдингер квант физикийн "Ньютоны тэгшитгэл" болсон Шрёдингерийн тэгшитгэлээ бичин квант физикийн математик шавыг тавилаа. Түүнтэй зэрэгцэн 25 дөнгөж шүргэж явсан Вернер Хейзенберг "Хейзенбергийн тодорхойгүйн зарчим"-аа боловсруулжээ. Квант физикийн тулгын чулуу гэгдэх Планк, Эйнштейн, Бор, Де Бройл, Шрёдингер, Хейзенберг тэргүүтний тусламжтайгаар 1900-1930 оны хооронд шинэ физик ийнхүү дүрээ олсон юм. Хар биеийн цацаргалт, фотоэлектрикийн үзэгдэл, устөрөгчийн атомын нарийн бүтэц, хос нүхний туршилтуудыг тэдний бүтээсэн квант механик л амжилттай тайлбарлаж, Штерн, Герлах нарын туршилт спин хэмээх цэвэр квант шинж чанарыг олж нээснээр орчин үеийн физикийн хоёр тулгын чулууны нэг тавигджээ.

Квант физикийн тайлбарууд: Бид бодит байдлыг таньж чадах уу?

Бидний өдөр тутмын амьдралд тохиолдож буй үзэгдлүүд бүгд өдгөө классик механик (классик физик) гэж нэрлэгдэх Ньютоны шавыг нь тавьсан онолын хүрээнд тайлбарлагддаг. Онгоц хөөрөх буух, галт тэрэг хурдсах зогсох, өндрөөс унаж буй зүйлс бүгдээрээ классик физикээр бүрэн тайлбарлагдах боломжтой. Гэвч бид классик физикийн хуулиудыг атомын гүнд ашиглаж эхэлбэл бүх зүйл орвонгоороо эргэнэ. Тэнд электрон нэгэн зэрэг хоёр газар оршиж, хэн нэгний ямар нэгэн шалтгааны улмаас олгогдсон зөвшөөрлийн дагуу л байр байрандаа орбитлож, оргүй хоосноос матери-анти материйн хос хоромхон зуурт үүсээд алга болно. Тэр ч бүү хэл асар өчүүхэн хугацаанд энерги хадгалагдах хууль ч зөрчигдөх аюултай. Гэсэн ч реалити нь (бодит байдал) угтаа квант физикийн хуулиудад захирагддаг гэдгийг бид баттай мэднэ. Харин эдгээр хуулийг хэрхэн хүний оюун ухаан ойлгохоор хэмжээнд буулгах вэ гэдэг нь одоо ч нууц. Өдгөө хүн төрөлхтөн квант технологийнэрин үед шилжиж, квант компьютер, квант хиймэл оюун, квант чип нь XXI зууны технологийн зорилт болжээ. Бид квант физикийн хуулиудыг маш сайн ойлгож, тэр ч бүү хэл жолоодож эхлээд байна. Хэдий тийм ч уг сууринд нь гүн гүнзгий шигдсэн нууцыг хараахан тайлж чадаагүй хэвээр. Гагцхүү эл нууцыг тайлах гэсэн оролдлого ахиад л Эйнштейнтэй холбогдох ч гол баатар нь Фейнман байв.

Планк тэргүүтэй эрдэмтдийн бүтээсэн квант физикийг Эйнштейний бүтээсэн Харьцангуйн Тусгай Онолтой нийцүүлэх нь 1930 оноос хойших физикчдийн зорилт болоод байлаа. Поль Дирак тэргүүтэй физикчид үүнийг амжилттай бүтээж, анти матери байх ёстойг анх таамагласан. Диракын амжилт Ричард Фейнман, Жулиан Швингер, Син-Итиро Томонага зэрэг эрдэмтдээр хөглөгдөн орчин үеийн квант физикийн ноён оргил “Квант орны онол”-ын үндсийг тавьсан билээ. Гэсэн хэдий ч квант физикийн гүнд өдгөө хэний ч зүүдэнд төсөөлөгдөмгүй хачирхалтай асуудал хариултаа нэхэн хүлээсээр байна. Алдарт физикч Ричард Фейнман квант механикийн лекцээ эхлүүлэхдээ “Квант механикийг хэн ч ойлгодоггүй юм” гэдэг байжээ. Харин зарим эрдэмтэн түүнийг “электронтой” хамгийн ойр сэтгэж чаддаг хүн байсан гэлцдэг.


Ричард Фейнман

Квант механик гэж юу вэ?

Квант механик бол атомын гүнийг судалдаг физикийн шинжлэх ухааны салбар. Гэхдээ атомын гүнд орчлон ертөнц орвонгоороо эргэчихдэг. Та өөрийгөө хэдэн триллион дахин жижгэрүүлээд нэг ширхэг электрон хөлөглөн давхиж байна гэж төсөөл дөө. Гэтэл таны өмнө хаанаас ч юм гэнэтхэн хоёр ширхэг хаалга гараад иржээ. Зүүн эсвэл баруун талын аль нэг хаалгаар орох сонголт танд бий

ГЭХДЭЭ БИД ЭЛЕКТРОН ХӨЛӨГЛӨЖБАЙГАА УЧРААС ХОЁР ХААЛГААР НЭГЭН ЗЭРЭГ ОРОХ СУПЕР ЧАДВАРТАЙ БОЛСОН ГЭВЭЛ ТА ИТГЭХ ҮҮ?

Атомын гүн дэх энэхүү хачирхалтай шинж чанарыг Де Бройлын бөөм-долгионы дуализм дээр үндэслэн анх амжилттай тайлбарласан. Зөвхөн гэрэл бөөм-долгионы хосолмол шинж чанартай бус орчлон ертөнц дээрх бүхий л бөөмс ийм шинж чанартай гэж үзвэл электрон нь долгион тул өнөөх хоёр хаалгаар нэгэн зэрэг нэвтэрч чадна. Түүнийг жолоодож буй та ч мөн адил тийм чадвартай болох ба үүний үр дүнд зүүн хаалгаар орсон таны хэсэг баруун хаалгаар орсон хэсэг хоорондоо нөлөөлж, интерференцийн үзэгдэл бий болдог. Ижил далайцтай долгионууд нэгнээ дэмжиж, эсрэг нь нэгнээ устгадаг интерференцийн үзэгдлийг бид маш сайн мэднэ шүү дээ. Гэтэл зөвхөн энэ долгион дээр л ажиглагддаг үзэгдэл электрон, фотон гэх мэт эгэл бөөмс дээр ажиглагдсан нь цочирдом нээлт байлаа. Электроны долгион хоёр хаалгаар долгиолон нэвтэрч интерференц үүсгэхийг хос нүхний туршилт гэдэг. Өөрөөр хэлбэл, электроны долгион хоёр хаалгаар нэвтрэх үед хаалга тус бүр долгионы үүсгүүрүүд болох бөгөөд тэдгээрээс цацарсан долгионууд ижил далайцтай бол нэгнээ дэмжин томорч, харин эсрэг бол усталцсанаар интерференц ажиглагддаг юм.

Нөгөөтээгүүр, интерференцийн үзэгдлийг электроныг долгион гэж үзэлгүйгээр тайлбарлаж болох өөр арга байгааг Ричард Фейнман өөрийн докторын ажлаар нээжээ.

ЭЛЕКТРОН ДОЛГИОН БИШ. ХАРИН ЭЛЕКТРОН ЗҮГЭЭР Л БҮХ БОЛОМЖИТ ХУВИЛБАРААР НЭГЭН ЗЭРЭГ ЯВАХ ЧАДВАРТАЙ!


Фейнман электроныг долгион биш харин хоёр хаалгаар хоёулангаар нь нэгэн зэрэг нэвтэрдэг буюу нэгэн зэрэг хоёр өөр газар байх онцгой чадвартай гэж үзжээ. Ингээд электроныг долгион бус хоёр хаалгаар нэгэн зэрэг нэвтэрдэг нэг ширхэг электрон өөрөө өөртөө нөлөөлснөөр интерференц ажиглагдана гэдгийг батлав.

Дээрх төсөөллийг гүнзгийрүүлэн энэ удаа таны өмнө хоёр бус харин гурван хаалга гарч ирлээ гэж саная. Өмнөх туршилтын адилаар та энэ удаа эргэлзэх зүйлгүйгээр гурван хаалгаар нэгэн зэрэг нэвтэрч чадна. Хоёроор чадаж байгаа юм чинь яагаад гурваар чадахгүй гэж? Тэгвэл дөрөв болгочихвол яах бол? Гурвыг чадаж байгаа юм чинь яагаад дөрвийг чадахгүй гэж, тийм ээ? Тэгвэл тав, зургаа, долоо болбол яах бол? Мэдээж айх зүйлгүй бүгдээр нь нэгэн зэрэг нэвтэрч л орхино. Хаалганы тоог ингэж нэмсээр хоорондоо хязгааргүй ойрхон, хязгааргүй олон хаалга гараад ирвэл яах вэ?

Бүгдээр нь нэгэн зэрэг нэвтэрч л орхино!

Эцэст нь хязгааргүй ойрхон, хязгааргүй олон хаалга байна гэдэг чинь яг үнэндээ ямар ч хаалга байхгүй харин та хөлөглөж яваа электронтойгоо хязгааргүй олон хаалгаар нэгэн зэрэг орж байгаатай адил нөгөө талд хүрч болох хязгааргүй олон төрлийн боломжит замаар нэгэн зэрэг явж байгаатай ижил.

За байзаарай, нэг л толгой эргээд эхэллээ...

Толгой чинь эргэж байвал санаа зоволтгүй ээ. Бүгд л энэ тухай анх сонсоод манарч орхидог юм. Дээрх бүгдийг базаад бичье:

А: Электрон бөөмлөг (материлаг) мөн долгиолог шинж чанартай тул интерференцийн үзэгдэл ажиглагддаг. Электрон долгион тул интерференц үүсгэнэ.

Б: Электрон бүх боломжит замуудаар нэгэн зэрэг явдаг тул интерференцийн үзэгдэл ажиглагддаг. Электрон нэгэн зэрэг олон газар байх чадвартай тул интерференц үүсгэнэ.

Тэгээд аль нь үнэн юм бэ?

Хоёулаа! Тийм ээ та буруу уншаагүй. Дээрх хоёр дүгнэлт хоёулаа үнэн.

А онол электроныг долгион шинж чанартай гэтэл Б онол электрон хоёр газар нэгэн зэрэг байдаг онцгой чадвартай гэсэн. Аль нь зөв болохыг бид туршилтаар шалгахын тулд аль онол нь интерференцийн үзэгдлийг зөв таамаглах вэ гэж асуух хэрэгтэй. Хамгийн хачирхалтай нь эдгээр хоёр онол хоёулаа яг адилхан интерференцийн үзэгдэл ажиглагдахыг таамагладаг. Гэтэл тэд чинь нэг нь электроныг ДОЛГИОН гээд, нөгөө нь БӨӨМ ч гэлээ хоёр газар зэрэг байдаг онцгой чадвартай гээд байгаа шүү дээ!

Хоорондоо зөрчилтэй ийм зүйл байж болох уу?

Квант механикийн үндсэнд нуугдах асуудал нь Эйнштейнд ч мөн таалагдаагүй. Хэрвээ бид дээрх квант ертөнцийг өдөр тутмын амьдрал руугаа буулгавал дэлхий дээрх бүх хүмүүс нэг бол долгион болж сарниад алга болчихдог, эс бөгөөс та яг одоо үүнийг уншиж байхтайгаа зэрэгцэн Ангараг гараг дээрх анхны колоничлолыг байгуулж байж мэднэ. Ийм байх боломжгүй! Өдөр тутмын амьдралд хүн хэзээ ч хоёр өөр газар нэгэн зэрэг байх боломжгүй. Бас долгион шиг сарниад алга болох ч боломжгүй.

Эйнштейн амьдралынхаа арав гаруй жилийг квант механикийг үгүйсгэхэд зориулсан. Хэдийгээр тэр энэ шинэ физикийг үндэслэгч нарын нэг байсан ч гэлээ квант механикийн хуулиуд нь түүний харьцангуйн онолтой зөрчилддөг байв. Мөн дээрх интерференцийн үзэгдлийг тайлбарлахад магадлал бий болдог. Квант физик өөрийн үндсэн магадлалт шинж чанартай байгаа нь түүнд таалагдсангүй.

Эйнштейн: Бурхан шоо хаяж тоглодоггүй юм.

Бор: Эйнштейн, Бурханы юу хийхийг түүнд бүү заа!

Харин Поль Диракаар ахлуулсан шинэ үеийн физикч нар квант физикийн дээрх хачирхалтай шинжүүд нь ирээдүйд нээгдэх илүү суурь онолоор тайлбарлагдана гэж үзэн “урагш” хөдөлжээ.

Квант физикийн ирээдүй: Ойлгохын төлөө!

Квант механикийн дээрх хоёр өөр тайлбар нь хоёр өөр реалитиг (бодит байдлыг) бүтээдэг ч туршилтаар ажиглагдах нэг л үр дүнг таамагладаг. Жишээ нь интерференцийн үзэгдэл. Электроныг долгиолог гэж үзсэн ч, электрон бүх замаар нэгэн зэрэг зорчих чадвартай ч эцсийн дүндээ адилхан л үр дүнг таамагладаг нь орчин үед квант механикийн өөр өөр хандлагыг бий болгожээ:

1. Квант механик бүрэн гүйцэд онол биш: Детерминистик биш, матери бөөмлөг болон долгиолог хос шинж чанартай байх боломжгүй.

2. Квант механик бүрэн гүйцэд бөгөөд хүн квант механикаар тайлбарлагдах бодит байдлыг ойлгох
чадваргүй.

3. Дээрхийн аль нь ч биш. Зүгээр л амаа хамхиад тооцооллоо гүйцэтгэ!

Эдгээрийн аль нь ч байлаа гэсэн ихэнх онолын физикчид квант механик бүрэн гүйцэд төгс онол мөн гэдэгт эргэлздэг. Хейзенбергийн тодорхойгүйн харьцаа, квант механикийн зөрчилдөөнтэй тайлбарууд, квант орооцолдоон (Quantum entanglement) зэрэг нь сэжиг төрүүлэм. Иймээс дэлхийн өнцөг булан бүрд квант механикийн үндсэн суурийг өөрчилж мэдэх туршилтын лабораториуд өдгөө идэвхтэй ажиллаж байна.

Маркус Акспелмейр болон Кейт Шваб нараар удирдуулсан макро квант системийн туршилт нь макро системүүд дэх интерференц болон квант эффектүүдийг хэмжих зорилготой. Үүний үр дүнд квант эффектүүд ямар хэмжээсээс эхлэн нөлөөлөхөө больж буйг хэмжиж, квант физикийн таамаглалтай жиших боломжтой юм. Мөн үүнтэй адил туршилтыг C60 молекул дээр Вена хот дахь Квант физикийн хүрээлэн хийж буй.

Интерференцийн үзэгдэл, Беллийн тэнцэл биш зэрэг Нобелийн шагналт туршилтуудад өмнө нь ажиглагдах боломжгүй байсан нөлөө нь квант физикийн өргөтгөсөн онолуудын таамаглалаар өнөөгийн технологиор ажиглагдах боломжтой гэж үзсэн туршилтууд ч бий. XXI зуун бол нарийвчлалын эрин үе бөгөөд физикийн шинжлэх ухааны бүхий л туршилт тэрбумаас триллионы нарийвчлалтай хэмжигдэх боломжтой болжээ. Иймээс өмнөх туршилтуудаар ажиглагдах боломжгүй байсан асар бага нөлөөг ахин хэмжиж, онолын таамаглалтай харьцуулах нь шинэ физикийн эхлэл ч болж мэдэх юм.

Мөн квант механик, харьцангуйн тусгай онолын нөхөрлөлөөс бүтсэн Квант орны онол нь математикийн хувьд бүрэн гүйцэд биш болохыг онолын физикчид нээжээ. Энэ нь магадгүй квант физикийг өргөтгөсөн ирээдүйн шинэ физик нь цоо шинэ математикийг ч шаардаж мэдэх юм хэмээх таамаглал руу ирээдүйн Эйнштейнүүдийг хөтөлж байна.

Хэдий бид квант физик чухамдаа ямар бодит байдлыг таамаглаж буйг бүрэн ойлгоогүй байгаа ч түүнийг жолоодож сурсан байна. Европын Цөмийн Шинжилгээний Нэгдсэн Институт, Адроны Аварга Хурдасгуур (CERN-LHC) дээрх туршилтууд нь квант физикийн тооцоололгүй бол хийгдэх боломжгүй. Учир нь квант компьютер нь цэвэр квант үзэгдлүүд дээр суурилсан тооцоолон бодох машин бөгөөд ирээдүйд квант телепортаци, квант хиймэл оюун биднийг хүлээж байна. Бид квант физикийн үндсэн суурь нь юу гэдгийг хараахан таниагүй ч түүнийг электрон шиг жолоодож сурчээ...


ОРЧИН ЕРТӨНЦ ХАЧИРХАЛТАЙ ТӨДИЙ БУС ХАРИН БИДНИЙ ТӨСӨӨЛЖ ЧАДАХААС Ч ИЛҮҮ ХАЧИРХАЛТАЙ.

Вернер Хейзенберг

Энэхүү нийтлэл нь Гэж Юу Вэ? сэтгүүлийн 2025 оны хаврын дугаарт багтсан бөгөөд бид тус сэтгүүлийн нийтлэлүүдийг цувралаар уншигч та бүхэнд хүргэж байна. Алдаж боломгүй агуулгуудыг шимтэн уншаарай. Мөн ЭНД дарж гурав дахь дугаарыг урьдчилан захиалах боломжтой.