Эдүгээ буюу одоо, өдгөө гэсэн үгээр нэрлэсэн www.eduge.mn нь мэдээний сайтууд дээрх контентуудын агуулгад хүний оролцоогүйгээр автоматаар дүн шинжилгээ хийж, интернэт орчинд хурдтай түгээгдэн, олон хүний уншиж буй нийтлэл мэдээллийг ялган гаргадаг. Болорсофт компанийн нэг бүтээгдэхүүн болох, машин сургалтад суурилсан мэдээллийн хэрэгслийн оюунт тогтолцоо хэмээн тодорхойлж буй энэ сайтыг Unread өнөөдөр онцоллоо.

Яагаад хэрэглэх хэрэгтэй вэ?

Яг одоо ямар зүйлийг хүмүүс хамгийн их сонирхон уншиж байна вэ, юу тренд болж байна вэ гэдгийг мэдэхийг тулд та энэ сайтыг ашиглаарай. Одоогоор montsame.mn, zaluu.com, shuud.mn, news.gogo.mn, mnb.mn, mass.mn, medee.mn, olloo.mn, ikon.mn гэсэн есөн бүртгэлтэй сайтын тренд нийтлэл мэдээнүүд тавигдахаас гадна Фэйсбүүк, Твиттерт ямар пост, ямар контентийг олон хүн share-лэж, уншиж байгаа нь энэхүү сайтаас харагдах юм.

Ямар онцлог, давуу талуудтай вэ?

Уг сайт интернэт дэх асар их мэдээллээс монгол хэл дээрх контентийг шүүж авч, түүнийгээ хэл зүй, үг зүйгээр задлан шинжилдгээрээ онцлогтой. Хэл зүйн шинжилгээнээс тухайн контентийн эерэг, сөрөг утгатай эсэх нь харагдахын сацуу олон нийтийн хариу үйлдлийг эерэг, сөрөг, саармаг гэсэн 3 ангиллаар үзүүлдэг. Мөн тархцын хурд, контентын урт, богино эсэхийг мэдээлдэг нь сонирхолтой санагдлаа.

Тухайн мэдээ нийтлэлийн тренд оноог тооцохдоо тухайн контентын сошиал медиа дэх тархац, уншигчдсан тоо, дотор нь бичигдсэн сэтгэгдлүүдийг харгалзаж үздэг байна. Эндээс та тренд мэдээллүүдийг эрүүл мэнд, спорт, улс төр гэх мэтээр 10 сэдвээр ангилан харж болно.

Түүнчлэн сайтууд нэг мэдээг давхардан оруулах буюу нэг нэгээсээ хуулбарласан байвал анхдаг эх сурвалжийг нь харуулдаг нь интернэт орчинд эрүүл систем бүрэлдэхэд хувь нэмэр оруулах болов уу.

Одооийн байдлаар Mongolnews.mn-д орсон Нэг жүжгийн үнээр гурван жүжиг үзнэ хэмээх нийтлэл мэдээний сайтуудын тренд контентыг тэргүүлж, МАХН-ын дарга Н.Энхбаяртай холбоотой контент хамгийн олон байгаа бол Твиттерт #100харүйлявдалд хаштаг, Фэйсбүүкт Боловсрол сувгийн фэйсбүүк хуудас дахь "Хайрлан хамгаалцгаая" пост тэргүүлэх тренд болж байна.

Ямар сул талтай вэ?

Одоогоор мэдээ мэдээллийг нь шүүн үзэж болох сайтууд арай цөөн байгаа юм. Мөн шинэ байгаа учраас өөрсдийнх нь хэлсэнчлэн "уг системийн санамж дөнгөж төрсөн хүүхдийнхтэй адил" байгаа болов уу. Гэхдээ цаашид байнга хөгжүүлж явна гэдэгт итгэж байна.

Unread-ийн үнэлгээ

Монгол хэл дээрх контентуудад програмын тусламжтайгаар автоматаар дүн шинжилгээ хийдэг, сайн сайт, сайн контентыг бидэнд ялгаж өгч чадах энэхүү сайтад бид 7 оноо өгч байна.