Өнгөрсөн амралтын өдрүүдээр Мэдээлэл Технологийн Үндэсний Парк залуусын эрч хүч, шинэ санаа, шинэ санаачлагаар дүүрэн байлаа. Энд бидний хойч ирээдүй болсон өсвөр үеийн хүүхэд, залуусын сэтгэцийн болон бэлгийн, нөхөн үржихүйн эрүүл мэндийн тулгамдсан асуудлуудыг бүтээлч, шинэлэг байдлаар шийдвэрлэх санааг тодорхойлох зорилго бүхий "Hacking for Youth Health" хакатон тэмцээн зохион байгуулагдсан юм. Нийт 19 багийн 140 гаруй залуус 48 цагийн турш оюун бодлоо уралдуулж, өөрсдийн дэвшүүлсэн санаануудаа танилцуулснаас онцлох 5 санааг бид нэрлэж байна. 

NPC - Таныг чиглүүлэх ухаалаг чатбот

Технологийн салбарын сүүлийн үеийн гол трендүүдийн нэг болоод буй чатбот-ыг ашиглан өсвөр насны хүүхдүүдээс шаардлагатай мэдээлэл цуглуулан, тэдэнд хүрэх санааг NPC баг гаргажээ. Тэд мэргэжлийн сэтгэлзүйчийн бэлтгэсэн маш энгийн асуултууд бүхий асуулгыг хүүхдүүдээс тодорхой хугацаанд асуух бөгөөд улмаар цуглуулсан тоон мэдээлэл дээрээ тулгуурлан урьдчилан бэлтгэсэн загварын дагуу дүн шинжилгээ хийн, тухайн хүүхдийн нөхцөл байдалд дүгнэлт өгөх гэнэ. Улмаар чатботын тусламжтайгаар хэрэгцээтэй гэж тодорхойлсон зүйлсүүдээ хүүхдүүдэд санал болгож, тэднийг хөгжүүлэхэд хувь нэмрээ оруулах аж. Хэрвээ тухайн хүүхдийн хариултуудаас "найз нөхөдгүй, ганцаардмал" байж магадгүй гэсэн үр дүн гарвал "одоо гарч найзтайгаа уулзаарай, цагийг хэн нэгэнтэй хөгжилтэй өнгөрүүлээрэй" гэх зэрэг саналыг чатбот явуулна гэсэн үг. Сэтгэл Судлалын Үндэсний Төвийн мэргэжлийн сэтгэлзүйчдээс бүрдсэн уг баг энэ тэмцээнд түрүүлж, 3 сая төгрөгийн эзэн болсон билээ.

Baymax - Тоглоомын найздаа зөвлөе

Өсвөр насны хүүхдүүдийн санаа бодлыг ойлгож, тэдэнтэй нээлттэй, илэн далангуй харьцаж чадах хүн бол үе тэнгийнх нь найзууд байдаг. Тэгвэл Baymax-ийнхан тэдэнд зориулан цахим найзыг нь бүтээжээ. Та энэ тоглоомыг суулгаснаар яг л өөртэйгөө адилхан асуудалтай, өөртэйгөө адилхан амьдралтай өсвөр насны найзтай болж байна гэсэн үг. Тэр танаас өөрт нь тулгарч буй бүхий л асуудлуудыг асууж, зааварчилгаа, чиглэл авна. Та түүний асуусан асуултуудад хариулт өгөн, зөв тийш нь залан, хамгийн дотны зөвлөх нь болж байгаагаар тоглоом өрнөнө. Энэ нь хүүхдүүд бодит амьдралын бүхий л асуудлыг өөрийн биеэр туулж байж ухаарах бус тоглоомон доторх хиймэл дүрээр дамжуулан туршлага мөн мэдлэгийг хуримтлуулах боломжийг нээж өгч байгаагаараа онцлогтой болжээ. Baymax-ийнхан энэ тэмцээнд 2-р байрт шалгарсан юм.

Berry - 3 секунд - 3 товшилт

Хамгийн энгийн гэхдээ хамгийн чухал санааг Berry баг хөнджээ. Ямар нэгэн хүн таныг араас тань дагах шиг санагдах үед, эсвэл ямар ч аргагүй хүчирхийллийн хүнд нөхцөл байдалд орсон үед ямар нэгэн аргаар хамгийн хурдан хугацаанд хэн нэгэнд мэдээлэл өгөн холбогдох нь маш чухал. Тэгвэл тэд дэвшилтэт технологийн боломжийг ашиглан хүчирхийллийн нөхцөл байдлын үед ердөө гуравхан секундын дотор өөрийн байршлаа, өөрийн урьдчилан бэлтгэсэн мессежийн хамтаар хэрэгцээтэй газар луу илгээн тусламж хүсэх боломжийг бий болгосон юм. Хүчирхийллээс урьдчилан сэргийлэх зорилго бүхий энэхүү апп нь оффлайн горимд буюу интернетгүй үед ч ажилладаг гэдгээрээ онцлогтойгоос гадна хөгжим сонсож байх үед шууд чихэвчнийхээ товчийг дарж, апп-аа ажиллуулах боломжтой гэдгээрээ ялгарч байлаа. Тэд энэхүү тэмцээнд 3-р байрт орсон билээ.

Phoenix - Эцэг эх бүрт хэрэгтэй "шипи"

"Хүн бүр математикч болох албагүй. Гэхдээ хүн бүр эцэг эх болно" гэдэг шиг хүүхэд өсгөх, хүмүүжүүлэх амаргүй давааг давахад тань туслах апп-ийг Phoenix багийнхан санал болгож байна. Тэд "Шипи" гэж нэрлэсэн энэ апп-аараа дамжуулан эцэг эхчүүдэд хүүхдүүдээ өсгөхөд тулгардаг асуудлууд, ялангуяа өсвөр насныхан болон шилжилтийн насандаа яваа хүүхдүүдтэйгээ хэрхэн зөв, үр дүнтэй харьцах талаар "шипи" өгөх гэнэ. Хүүхдэдээ юу гэж хэлэх, ямар асуулт асуух, ямар зүйлсийг хамтдаа хийхээс эхлүүлээд ямар бэлэг өгөх, ямар кино үзэх зэргийг хүртэл танд энэ апп санал болгох болно. Сонирхуулахад уг апп-ийг бүтээгчид нь MIT Global Startup төслийн ялагчдаар тодорч байсан билээ.

Dino - Таны сайн халамжит найз

90-ээд оны залуусыг өөртөө донтуулж байсан "тамагочи"-ийн орчин үеийн хувилбар "Дино"-той танилц. Таны хамгийн дотны найз, үнэнч туслах тань байж чадах энэ бяцхан динозавр таны сэтгэлийг засах дууг санал болгож, өөрийгөө нээх арга хэмжээнүүдэд урих болно. Мөн танд хэрэгтэй зөвлөгөөнүүдийг хэрэгтэй цагт чинь өгч, тантай хамт хөгжинө. Таныг өөртөө анхаарахгүй, хоолоо идэхгүй, дасгал хийхгүй бол тэр гуниглана. Таныг сайн дүн авч, зөв үйлдэл хийхэд тань тэр баярлаж, хөөрнө. Тиймээс Диногийн сайн халамжит найз нь байхын тулд та ч өөрөө хичээх хэрэгтэй болох нь.

Ташрамд сонирхуулахад уг тэмцээнийг НҮБ-ийн Хүүхдийн сан, Нийгмийн Эрүүл Мэндийн Үндэсний Төв болон "Creative Workshop" ХХК-ууд хамтран зохион байгуулжээ.