Өнөөдрийн дугаартаа бид дэлхийн 95 улсад эрүүл амьдралын хэв маягийг түгээж буй “Herbаlife Nutrition” компанийн Монгол дахь салбарын суурин төлөөлөгч Г.Дэнзэнийг урилаа. Дипломат гэр бүлд төрсөн тэрээр хүүхэд насаа Японд өнгөрүүлж, дорнын болон дипломат соёлын дунд өсжээ. ОХУ-ын Москвагийн Техникийн их сургуульд инженерээр төгссөн түүний хувьд худалдаа, бизнесийн салбарт олон жил ажилласан туршлагатай. Өдгөө тэрээр "Herbalife Nutrition" компанийн Монгол дахь салбарыг удирдаж, олон мянган хүнийг эрүүл, зөв амьдралын хэв маягт хөтлөхийн сацуу Швейцарын Кумбриа их сургуульд олон нийтийн эрүүл мэндийн удирдлагын магистрын хөтөлбөрт зайнаас суралцаж буй юм. 

Байршил: Монгол, Улаанбаатар
Эрхэлдэг ажил: "Herbalife Nutrition" компанийн Монгол дахь салбарын суурин төлөөлөгч
Хэрэглэдэг гар утас: iPhone 11 Pro
Хэрэглэдэг компьютер: Macbook Air
Сошиал хуудас: Denzen Ganbold Tsuukhr (Facebook), Denzen Ganbold Tsuukhr (LinkedIn)

1. ТАНЫ КАРЬЕРААС БИД ЮУ, ЮУГ МЭДЭХ ЁСТОЙ ВЭ?

Эцэг эх маань олон жил дипломат албанд ажилласан. Тиймээс төрснөөсөө хойш Японд амьдарч, хүүхэд насныхаа 7-8 жилийг өнгөрүүлсэн юм. Тухайн үед аав Япон дахь ЭСЯ-ны нэгдүгээр нарийн бичгийн дарга, орлогч элчин сайдаар ажилладаг байсан. Удалгүй аав маань Москвад дипломат академид олон улсын харилцааны чиглэлээр магистр хамгаалахаар болж гэр бүлээрээ ОХУ-д түр хугацаанд амьдарсан. Японд байхдаа өглөөдөө ЗХУ-ын ЭСЯ-ны харъяа орос сургуульд, оройдоо япон сургалт, дамжаанд явдаг байлаа. Ингээд Монголд ирсэний дараа Орос III сургуулийг төгсөөд МУИС-д олон улсын харилцааны чиглэлээр суралцаж байхдаа ОХУ-ын Москвагийн Техникийн их сургуульд тэнцэж, автоматжуулалтын инженерийн чиглэлээр төгссөн. Одоогоор Кумбриа их сургуулийн хөтөлбөрөөр Швейцарын их сургуульд нийтийн эрүүл мэндийн чиглэлээр магистр зэрэг хамгаалахаар зайнаас суралцаж байгаа. Их сургуулиа төгссөнөөс хойш худалдаа, үйлчилгээний салбарт голчлон бизнес хөгжил, борлуулалтыг хариуцан ажилласан юм байна.

"Herbalife Nutrition" компанийн хувьд анх 1980 онд эрүүл амьдралын хэв маягийг дэмжих зорилгын хүрээнд АНУ-д байгуулагдсан. Монголын зах зээлд 2000 оноос борлуулагдах болж, 2011 онд албан ёсны салбараа нээсэн юм. Миний хувьд 2008 оноос хойш тус брэндийн бүтээгдэхүүнүүдийг хэрэглэж, эрүүл мэндийн хувьд бодитой өөрчлөлт, үр дүн гарсан учраас Монгол дахь салбарыг удирдах ажлын саналыг хүлээн авч, өнөөг хүртэл хариуцан ажиллаж байна.

2. ТАНЫ АЖЛЫН ДУНДАЖ НЭГ ӨДӨР ХЭРХЭН ӨНГӨРДӨГ ВЭ?

Өглөө 6 цагт босоод өглөөний цайгаа уусны дараа 20 минут тогтмол ном уншдаг. Дараа нь, тухайн өдөр хийх ажлуудаа тогтоож нэг хараад ажилдаа гарна. Олон улсын хэмжээнд үйл ажиллагаа явуулдаг бизнесийн нэг хэсгийг удирдаж буйн хувьд ажил дээр гадаад, дотоод уулзалтууд тогтмол хийдэг. Заримдаа цагийн зөрүүний улмаас ажлын бус цагаар цахим уулзалт, хурал хийх нь бий.

3. ТАНЫ АЖЛЫН НӨҮ-ХАУ?

Хийхээр бодож, төлөвлөсөн зүйлсээ цаасан дээр бичиж тэмдэглэхээс гадна шинэ санаа, сэдэл төрсөн үед дуу хураагууртаа бичээд хадгалчихдаг. Дасгал хөдөлгөөн хийхээс гадна тархи толгойгоо амраах, ой санамжаа дэмжих, цусан хангамжаа сайжруулах үүднээс тохирох амин дэмүүдийг сонгож хэрэглэдэг. Миний хувьд Омега, Витамин Е зэрэг олон төрлийн шим тэжээлтэй нэмэлт бүтээгдэхүүн хэрэглэж, бие, сэтгэлзүйн хувьд эрүүл, чийрэг байхад анхаардаг.

4. АШИГЛАХГҮЙ БАЙЖ ЧАДДАГГҮЙ АПП, ХЭРЭГСЛҮҮД ЮУ ВЭ?

Манай хамтрагчид ёстой л дэлхийн өнцөг булан бүрд байдаг учраас байнга холбоотой байж, үр дүнтэй уулзалт хийх хэрэгтэй байдаг учраас дижитал технологи өргөн ашигладаг. Үүний тулд цагийн менежмент сайтай байх хэрэгтэй. Суурин болон зөөврийн компьютер, iPad, гар утас зэргийг өдөр тутамд хэрэглэж, Microsoft-ийн байгууллагад зориулсан програмуудыг түгээмэл ашиглана. Үндэсний статистикийн хорооны 1212.mn аппаас нийгэм, эдийн засгийн тоо баримтыг сонирхож уншдаг. Бизнес эрхлэгчид эргэн тойрондоо юу болж буйг анзаарч, цаг үетэйгээ хөл нийлүүлж явах шаардлагатай учраас мэдээллээс хоцрохгүйг хичээнэ.

5. ЦАГ ХЭМНЭХ ХАМГИЙН САЙН АРГА ТАНЬ ЮУ ВЭ?

Цаг ашиглаж сурна гэдэг том ухаан. Түүний учрыг олж чадахгүй бол ямар ч давааг давахад хэцүү, тэгвэл бие, сэтгэл зүйн бүх эрч хүчээ алдана. Тэр нь зөвхөн танд биш, хамт олон, хажууд байгаа хүмүүст хүртэл нөлөөлөх учраас цагийг зорилготой уяж төлөвлөх нь тун чухал.

6. ХИЙХ АЖЛАА ХЭРХЭН ТӨЛӨВЛӨДӨГ ВЭ?

Дижитал, цаас хослуулан хийх зүйлсээ тэмдэглэдэг. Бид хийх ажлын төлөвлөгөөгөө жилийн өмнөөс нарийн тооцож гаргадаг учраас гэнэтийн, төлөвлөгөөгүй ажил барагтай гардаггүй.

7. ЭРЧ ХҮЧЭЭ ХЭРХЭН СЭЛБЭДЭГ ВЭ?

Өөрт олдсон цагийг тултал нь ашиглахыг хичээх нь зүйтэй. Ажлаа хийж байхдаа өөр зүйлд санаа зовоод байвал ажлаа ч, асуудлаа ч шийдэж чадахгүй хоёрын хооронд өнгөрнө. Амарсан үедээ амарсан шиг амарч, дуртай зүйлээ хийх хэрэгтэй. Мөн фитнесээр тогтмол хичээллэж, гэр бүлтэйгээ цагийг өнгөрөөнө гэдэг эрч хүчээ сэлбэх хамгийн чухал зүйл гэж боддог.

8. ҮНДСЭН АЖЛЫНХАА ХАЖУУГААР ДУРЛАЖ ХИЙДЭГ ТӨСӨЛ/АЖИЛ ЮУ ВЭ?

Ажлын хажуугаар зав зай гарвал найз нөхөд, таньдаг хүмүүстээ бизнес хөгжлийн зөвлөгөө өгч, ярилцдаг даа.

9. ХИЙЖ БУЙ АЖЛЫН ОНЦЛОГ ЮУ ВЭ? ЭЕРЭГ САЙН БА ХЭЦҮҮ БЭРХШЭЭЛТЭЙ ТАЛУУД?

Бизнес эрхлэхэд нийгэм, эдийн засгийн янз бүрийн нөхцөлд ажиллах шаардлага гардаг учраас сорилтоор дүүрэн. Иймд үед бизнесийн давуу тал, нөөц, боломжоо ашиглаж, үр дүнтэй ажиллахыг хичээдэг. Бид бүтээгдэхүүн, үйлчилгээгээрээ дамжуулан олон хүний амьдралыг өөрчилж, зөв, эрүүл чиг хандлагыг түгээж буйдаа урамтай байдаг.

10. ТА ОДОО ЮУН ДЭЭР ТӨВЛӨРЧ БАЙГАА ВЭ? ОЙРЫН ТӨЛӨВЛӨГӨӨ?

Бид нийгмийн хариуцлагад өндөр ач холбогдол өгч ажилладаг. Бүтээгдэхүүнээрээ дамжуулан хэрэглэгчдэд эрүүл амьдралын хэв маягийг хэвшүүлж, хүн бүрийг эрүүл, аз жаргалтай байхад туслах мэдлэг, боловсролыг олгоно гэж итгэдэг Өдгөө дэлхий 95 улсад үйл ажиллагаа явуулж байгаа Herbalife Nutrition компани маань 40 жилийн түүхтэй. 300 гаруй эрдэмтнийг багтаасан эрдэм шинжилгээний багийг Нобелийн шагнал хүртсэн доктор, профессорууд ахалж ажилладаг. Тэдний хийсэн судалгааны ажлууд, зөвлөмжийг олон нийтэд хүргэхийн тулд Эрүүл амьдралын клубээрээ дамжуулан хүмүүст зөв хооллох, шим тэжээл гэж юу болох тухай олон хэрэгтэй мэдээллийг түгээж, хэрэглэгчдийнхээ амьдралын чанарыг дээшлүүлэхийг зорьж ажилладаг. Манай бизнесийн хамтрагч болох боломж хэн бүхэнд нээлттэй. Цар тахал нүүрлэж, хөл хорио тогтоосонтой холбогдуулан бид нийгмийн хариуцлагынхаа хүрээнд Эрүүл мэндийн яаманд 51.7 сая төгрөгийн хандив өргөөд байна.

11. ТА ӨӨРИЙГӨӨ ХЭРХЭН ХӨГЖҮҮЛЖ, СУРАЛЦДАГ ВЭ?

Нэг таньдаг ах маань гурван тооройн тухай үлгэрийг уншаад өөрт нь ямар санаа, бодрол төрснийг ярьж билээ. Ах дүү гурван тороой тоглож наадан зуныг хөгжилтэй өнгөрөөсний дараа намар болж сэрүүсэхэд өвөлжих байшингаа барих хэрэгтэй болдог шүү дээ. Ингээд чоно гарч ирээд гурван байшинг ээлжлэн үлээхэд өвс, мөчрөөр хийсэн байшин хийсэж, тоосгоор хийсэн нь үлдсэн тухай гардаг. Үлгэрт гардаг чоно бол бидний амьдралын бэрхшээл, даваа гэж харж болно. Өөрийгөө боловсруулж, хөгжүүлэхгүй өдөр хоногийг аргацааж өнгөрүүлсээр байвал ганц давааг ч давж чадахгүй бүдэрнэ гэсэн санаа. Харин хийж буй зүйлдээ цаг гаргаж, ирээдүйгээ бодож чадвал зөвхөн өөрийгөө гэлтгүй бусдыг дэмжиж, хамгаалж чаддагийн жишээ бол тоосгоор байшин барьсан тооройн үйлдэл юм. Энгийн үлгэр мэт боловч амьдралын олон сургамжтай. Энэ мэтчилэн хүнээс, номоос, хийж буй зүйлээсээ алхам тутам суралцахыг хичээдэг дээ.

12. САНАЛ БОЛГОХ НОМ, ХӨГЖИМ, КИНО?

Юун түрүүнд, төрийн шагналт зохиолч, академич Ш.Нацагдорж буюу өвөөгийнхөө бичсэн Халхын түүх номыг онцолъё. Өвөө маань “Мандухай сэцэн хатан”, “Болор толь” роман, “Хубилай сэцэн”, “Чингис хааны цадиг” зэрэг Монголын түүхийн чиглэлээр олон арван бүтээл туурвиж, Монгол Улсад түүхийн шинжлэх ухааныг хөгжүүлэхэд хувь нэмрээ оруулсан хүн.

Би алдартай эрхмүүдийн намтар түүх, олны өмнө тавьсан илтгэлүүдийг сонирхон судлах дуртай юм. XX зууны нэрт зүтгэлтэн, БНХАУ-ын дарга асан Дэн Сяопин Оросын анхны эзэн хаан I Петрийн үйл хэргийг сонирхон судалдаг байсан гэдэг. Орчин үед Орос гүрэн бий болох зам мөрийг эхлүүлсэн гэгддэг I Пётр хааны тухай номыг уншихыг санал болгоё.

Мөн АНУ-ын 40 дэх Ерөнхийлөгч Роналд Рейганы The Last Best Hope, Ерөнхийлөгч Барак Обамагийн We are change We seek: The Speeches of Barack Obama, Католик сүмийн тэргүүн, пап лам Францискийн The Path to Change and Thoughts on Politics and Society, Жэки Чаны Би аз жаргалтай хүн гэхчлэн алдартай эрхмүүдийн тухай бүтээлийг уншиж байна.

Би энэ мэтчилэн хүний амьдралын түүх, сургамж, утга учрын тухай сонирхож уншсаар философи сонирхдог болсон юм. Философи сонирхдог хүмүүст Уильям Джеймс Дюрантын The Story of Philosophy номыг санал болгомоор байна. Аристотель, Сократаас эхлээд орчин үеийн философичдын түүх, үзэл санаа, урсгалыг цэгцтэй тайлбарласан сайн бүтээл.

Хөгжмийн хувьд метал (thrash metal) болон сонгодог хөгжим сонсох дуртай. Сонгодгоос сүүлийн үед Голландын хийлч Андре Рьёгийн бүтээлийг шимтэн сонсож байна. Харин металын хувьд Metallica, Megadeth, Anthrax, Slayer хамтлагийн дуунд дуртай.

13. АВЧ БАЙСАН ХАМГИЙН САЙН ЗӨВЛӨГӨӨ?

Аавын хэлсэн “Ухаалаг байгаарай” гэдэг үгийг үргэлж санаж явдаг. Ухаантай байна гэдэг нь бусдад садаа болохгүйгээр аливааг зөв, ёс зүйтэй хийхийг хэлсэн санаа. Үүнийг зах зухаас ойлгож, амьдралдаа хэрэгжүүлэхийг хичээж явна.

14. БУСДАД ШИДЭХ САНАА?

Бат бөх, гэрэл гэгээтэй амьдралыг бий болгохын төлөө дор бүрнээ хичээгээрэй. Хүн юу хийж чадах вэ гэдгээ бага боддог юм шиг. Юу хийж чадахаа мэдсэн цагаас бүх зүйл эхэлдэг. Тэр нь том, жижиг байх нь хамаагүй. Өнөөдрийн жижиг зүйл ирээдүйд том болохын эхлэл юм.