Apple жил бүрийн есдүгээр сард iPhone утсаа танилцуулдаг бол аравдугаар сард нь iPad, Mac зэрэг бусад төхөөрөмжүүдийн шинэчлэлээ зарладаг уламжлалтай. Энэ удаа тэд долоо хоногийн турш шинэ зүйлс танилцуулав. Тэдгээртэй хамтдаа танилцъя.

M4 чип

Apple өөрсдөө чипээ үйлдвэрлэдэг болоод дөрвөн жил өнгөрчээ. Өнгөрсөн тавдугаар сард 7-р үеийн iPad Pro-той танилцуулсан хамгийн сүүлийн үеийн чип бол M4. Харин энэ удаагийн арга хэмжээний үеэр M4 Pro болон M4 Max хувилбарыг танилцууллаа. Өмнө оны хувилбараасаа 25-40 хувь хурдан эдгээр чипүүд Apple-ийн Apple Intelligence нэрийн дор гаргаж эхэлсэн хиймэл оюун ухааны функцүүдийг дэмжих, машин сургалтад зориулсан, эрчим хүчний хэмнэлттэй гэдгээрээ онцлог.


Илүү хүчирхэг iMac

Apple-ийн суурийн компьютер iMac шинэчлэгдэн хүчирхэг M4 чиптэй болов. Ингэснээр M1 чиптэй iMac-аас өдөр тутмын хэрэглээнд 1.7 дахин, зураг бичлэг засах, тоглоом тоглоход 2.1 дахин хурдан болжээ.

Шинэхэн хувилбарын эхлэх үнэ нь 1,299 доллар бөгөөд 4.5K дэлгэц, хоёр ширхэг Thunderbolt USB-C оролт, 16GB шуурхай санах ойтой. Дэлгэцийн хэмжээ нь өмнөхтэйгөө адил 24 инч ч хүсвэл 200 доллар төлөөд нано гадаргуутай тусгал, гялбаа бууруулах шилтэй хувилбарыг авч болно. Хамгийн үнэтэй хувилбар нь 2,899 доллар бөгөөд энэ хувилбарын багтаамж нь 2TB, шуурхай санах ой нь 32GB юм. Ногоон, шар, улбар шар, ягаан, нил ягаан, цэнхэр, мөнгөлөг гэсэн долоон өнгөний сонголттой.


Бүхнээс хүчтэй MacBook Pro

Apple хамгийн хүчирхэг MacBook Pro-гоо ахин нэг шат ахиулж, M4, M4 Pro, M4 Max гэсэн гурван төрлийн чипний сонголттой болгов. Түүнээс гадна нэг цэнэглэлтээр 24 цаг хүртэл ажиллах чадалтай бөгөөд ердөө 30 минутад 50 хувийн цэнэгээ авдаг гэнэ. Хэмжээний хувьд өмнөх шигээ 14 болон 16 инч гэсэн хоёр сонголттой. iMac-тай адилаар 200 доллар нэмж төлөөд нано гадаргуутай дэлгэцтэй авч болно. MacBook Pro-ийн эхлэх үнэ 1,599 доллар бол хамгийн үнэтэй хувилбар (128GB шуурхай санах ой, 8TB багтаамж, M4 Max чип) нь 7,349 долларын өртөгтэй.



Хамгийн жижиг Mac mini

Бие жижиг ч бэлчээр том Mac mini өмнөх хувилбараасаа хоёр дахин жижиг болов. Гэсэн ч үзүүлэлт нь улам нэмэгдэж, M4 болон M4 Pro чипний сонголт, 16GB-64GB шуурхай санах ойтой болжээ. M1 чиптэй хувилбараасаа хамгийн багадаа 2 дахин хурдан энэ хувилбар хоёр USB-C, лан, чихэвч, HDMI болон гурван Thunderbolt USB-C оролттой. Эхлэх үнэ нь 599 доллар бөгөөд ижил үнэтэй суурийн компьютероос 20 дахин жижиг хэмжээтэй ч 6 дахин хүчин чадалтай гэнэ.


Бусад

- MacBook Air-ийн суурь (base) шуурхай санах ой нь 8GB байснаас хоёр дахин нэмэгдэж, 16GB болов. Бусдаар өөрчлөлт орсонгүй. M2, M3 чипний сонголт хэвээр үлдэв.
- Magic Keyboard, Magic Trackpad, Magic Mouse гэсэн төхөөрөмжүүд USB-C оролттой болов. Гэсэн ч Magic Mouse-ийн оролтын байрлал солигдсонгүй.
- Apple Intelligence нэрийн дор хиймэл оюун ухааны функцүүд Mac, iPhone, iPad-уудад нэвтэрч эхэллээ. Эдгээрийг ашиглахын тулд юун түрүүнд бүртгүүлээд хүлээлгийн жагсаалтад (waitlist) орох юм.